Kumin Synod Inkhawmpui Thlarau lam thupui chu 'Chhungril lama takna' (Sam 51:6) tih a ni. Dec. 8-ah Nomination an thu a. Dec. 9 & 10 chhungin Rorel a ni a, Dec. 11 chawhmaah Pastor nemngheh, Pro. Pastor dahngheh inkhawm leh Department Head 2 leh Minister Pension tur te thlah an ni ang a, chawhnuah Minister thi sunna leh Moderator Valedictory Sermon ngaihthlak a ni ang. Synod Inkhawmpuiah hian zan lamah vantlang Pathian Biak Inkhawm programme siam a ni lo.
Dec. 11 inkhawm chawhma leh chawhnu programme hi Hruaina Eng TV Channel leh Youtube-ah leh LPS 1 leh Zonet Zawlbuk-ah Live a tihchhuah tum a ni.
Kumin 2020 Synod Inkhawmpuia puipate chu heng te hi an ni :
Moderator : Rev. Dr. C. Lalhlira
Secretaries : Rev. Vanlalrova Khiangte (Sr.) & Upa Lalrinmuana (Jr.)
Finance Officers : Rev. B. Sangthanga, Executive Secretary & Rev. Lalramliana Pachuau
Statistician : Rev. J. Lalremsiama, Vaivakawn
Executive Secretaries : Rev. Lianhmingthanga Sailo & Rev. K. Lalrinmawia
Synod Inkhawmpui hi kum 2010 atang khan Bial-in an thleng tan a, kumin 2020 hian Dawrpui Bialin Dawrpui Kohhranah an thleng a ni.
Kumin Synod Inkhawmpui hi hripui (covid-19) leng mek avangin kum dang angin hman a remchang lova, hemi avang hian Synod Executive Committee (SEC) meeting November 10 - 12, 2020 a neih chuan ruahmanna thar a siam a. Synod Inkhawmpui hun pawt tawiin December 8 - 11, 2020 chhungin Dawrpui Kohhran Biak Ina neih turin a rel a. Synod Palai tur pawh ti tlemin - Synod Puipate, Synod Nomination Committee te, SEC member te, Pastoral Committee member te, Finance Committee member te leh Superintendent, Synod Office te chauh palai turin ruahmanna a siam a ni. He ruahmannaah hian Mizoram pawn lam palai chu tel lo tura ngaih an ni.
For more Pics Click Here