Vawiin (Feb. 3, 2021) chawhma dar 10:00 khan Synod Ramthar Board Committee vawi 171-na chu J.M. Lloyd Hall, Synod Office-ah an thu.
Committee hi Synod Moderator Rev. Dr. C. Lalhlira’n a kaihruai a, Secretary Rev. C. Zorammawia’n report a pe a, report-ah hian Ramthar Board Executive Committee thurel hrang hrang bawhzui a nih dan te, Synod Inkhawmpui 97-na (2020)-in Bial thar hawn a remtih angin Jugicherra Bial (Barak Area) leh Chhimtuipui Bial (Masihi Sangati) te hawn thar niin Bialtu Pastor turte pawh dahnghel nghal an nih thu te, SEC remtihna angin Bru tawnga Pathian Biak Inkhawm Hruaina Bu buatsaih mek anih thu te, Synod Mission Board hnuaia Contract basis-a thawk mek zingah kum 2021-a Contract renew zat 106 an awm a, Field chhung transfer 28 awmin Inter-Field transfer 11 leh transfer (contract) 63 an awm thu te, tun hnaiah thawktu thi 3 an awm thu te leh kum 2020 (January - December) chhungin ringthar 5148 an awm thu te tarlan a ni bawk.
Tun tum committee-ah hian thu pawimawh tak tak 12 zet ngaihtuah a ni a. Thu ngaihtuah tur zinga langsar zualte chu - Roman hawrawpa Bengali Thuthlung Thar bu buatsaih chungchang te, Tripura Presbyterian Church Synod leh Mizoram Synod Mission Board (SMB) inkarah Partnership Worker dah rawtna te, Mizoram Presbyterian Church (MPC) leh Presbyterian Church of Myanmar (PCM) General Assembly Mission thawh ho dan tur chungchang te an ni.