Mizoram Synod, Family Guidance & Counselling Centre (FG&CC)-in Kohhran hruaitute puala March 9, 2021 atanga Synod Conference Centre-a Church Leaders' Intensive Residential Pastoral Care & Counselling Training vawi 32-na a buatsaih chu March 23, 2021 (Thawhtanni) zan khan ‘Final Evaluation & Graduation Service’ neiin khar a ni.
Training kharna inkhawm hi Rev. B. Sangthanga, Executive Secretary i/c FG&CC-in a kaihhruai a, Rev. Lalsangbera, FG&CC Director-in inlawmna hun hmangin FG&CC report tlangpui a tarlang. Rev. Dr. C. Lalhlira, Synod Moderator-in training chhuakte hnenah Certificate semin thuchah a sawi a, Counselling training pawimawh zia leh training chhuak ten hlawk taka hmang zel turin a chah. Nl. Cindy Lalthanpuiin zaia rawngbawlna hun vawi 2 a nei bawk. He counselling training-ah hian Bial 10 atangin Kohhran tin aiawh mi 19 an tel a ni.
Training kharna inkhawmah hian training chhuakte chuan an hlawkpui dan a lema an ziak chu entirin an hrilhfiah a, Upa Lalmalsawma, Chawnpui chuan training chhuakte aiawhin thu a sawi a. Rev. J. Lalremsiama, Com. Member, FG&CC huan training chhuakte a tawngtaisak a, Rev. P.C. Pachhunga'n i malsawm tawngtaina in a tin a ni.
FG&CC hian Pastoral Care & Counselling Training hi Pastor-te pualin vawi 28buatsaih tawhin, Pastor 479 training a neihpui tawh a. Church Leader-te puala kum 2002 atang khan training vawi 32 nei tawhah Kohhran hruaitu 618 Training pek an ni tawh bawk a ni.
Mizoram Synod hian Counselling Centre pariat (8) - Mission Veng, Bawngkawn, Vaivakawn, Champhai, Serchhip, Kolasib, Lunglei leh Mamit, Khawzawl- ah te a nei a. Heng Counselling Centre-ah hian March 8.3 2021 thlenga pantu (Client) an neih tawh zat chu mi 34,824 an ni a, kumin bikah mi 1,089 an nei tawh a ni.