March 27, 2021 (Inrinni) khan Hmawngbu Pastor Bial chhunga T. Dûmzau-ah kang mei a chhuak a, hemi thu hriat anih veleh Synod Office, Lunglei leh Aizawl atangin chhawmdawlna tur kawng zawn nghal a ni a. Rev. Lianhmingthanga Sailo, Senior Executive Secretary leh Rev. K. Lalrinmawia, Executive Secretary i/c Social Front te ruahmanna-in Synod chuan Conference Centre-a Quilts (blanket) leh Charity store-a thuamhnaw engemaw zat Pick-up trip khat Aizawl atangin thawn phei a ni a. Synod Office, Lunglei-a thawktu chhungkuate’n thawmhnaw leh bungbel te engemaw zat an khawnkhawm bawk.
Heng chhawmdawlna thilpek pe tur hian Rev. John Raldosanga, Administrative Secretary, Lunglei Synod leh Staff mi 8 te chu March 28, 2021 (Pathianni) khan motor 3 hmangin T. Dûmzau-ah hian an kal nghal a. Kang mei tuar chhungkaw 25-te hnenah Rs.1,80,000/- leh hnatlang thingpui senso atan VC-te hnenah Rs.5,000/- an hlan. Mut bu (Blanket) leh thawmhnaw leh bungbelte thahnem tak an hlan nghal bawk.
Heng chhawmdawlna thilpek pawisa fai hi Rev. John Raldosanga, Administrative Secretary-in Mizoram Synod hmingin a hlan a, mut bu te hi Rev. H. Zoliansanga, Hmawngbu bial vawngtuin a hlan thung a ni.
