Zanin (April 16, 2021) zan dar 6:30 khan Synfo buatsaih Mizoram Presbyterian Kohhran hnuaia Kohhran hrang hrangte tana intihsiakna Reality programme leh Kristian Film insiamsiak result puanna leh lawmman semna Synfo Studio-ah neih a ni. Programme hi Hruaina Eng Channel leh Synod Information Youtube Channel-ah te LIVE-a pek chhuah a ni.
Lawmman semna hunah hian Rev. K. Lalrinmawia, Executive Secretary incharge Synfo-in hunserh a hmang a, Synfo Coordinator Pu Lalchhungliana’n Report pe-in inhmelhriattirna leh lawmthu sawina a nei a, Synod Moderator Rev. Dr. C. Lalhlira’n lawmman semin lawmman pakhatna atanga pathumna dawngtute hnenah a hlan a, thuchah tawi a sawi nghal a ni. Intihsiakna endiktute atangin Pu Vanneihtluanga leh Upa C. Lalremsiama ten thu an sawi bawk.
Reality programme leh Kristian Film insiamsiakah hian Kohhran 41 an tel a, Kristian Film-ah Kohhran 13, Reality Programme-ah Kohhran 28 an tel a ni.
Hetiang hian lawmman hrang hrang siam a ni.
Reality programme-ah pakhatna-in Rs. 50,000/- leh trophy, pahnihna-in Rs. 30,000/- leh trophy, pathumna-in Rs. 20,000/- leh trophy an dawng a. Kristian Film-ah lawmman pakhatna-in Rs. 1,00,000/- leh trophy, pahnihna-in Rs. 70,000/- leh trophy, pathumna-in Rs. 60,000/- leh trophy an dawng a ni.
Intihsiaknaa tel zawng zawng ten participation prize - Reality programme-ah Rs. 5,000/- leh Memento leh Kristian film-ah Rs. 10,000/- leh memento an dawng vek ang. Covid-19 hripui leng avanga Mizoram Sawrkarin inkaihhruaina a tihchhuah angin intihsiaknaa tel, participation prize dawng turte hi zanin bikah chuan programme-a tel tura sawm theih an ni ta lova, hun remchangah Synfo lamin office-a lam theih turin ruahmanna a la siam ang.
Intihsiakna lawmman dawngtu Kohhrante chu :
Kristian Film :
Pakhatna : Khatla East Kohhran - Delivery Boy
Pahnihna : Tuikual North Kohhran - Tawngtai Chhanna
Pathumna : Bethlehem Kohhran - A Nung
Reality Programme :
Pakhatna : Champhai Vengthlang Kohhran - Buaipui tham Isua
Pahnihna : Dawrpui Vengthar Kohhran - Fakna Zai Ri
Pathumna : Dam Veng Kohhran - Fakna Thiltihtheihna
Heng Kristian Film leh Reality programme hrang hrangte hi Hruaina Eng channel-ah pek chhuah leh tura ruahman a ni.
For more Pics Click Here