Rev. Dr. Lalngurauva Ralte (kum 79), pensioner chu vawiin (Aug. 11, 2021) chawhma dar 10:30 khan a thi a, vawiin tlai dar 3:00 khan Mission Vengthlang Kohhran Biak Inah Rev. Dr. C. Lalhlira, Moderator, Mizoram Synod-in a vui.
Pian leh murna: Rev. Lalngurauva Râlte hi 10 June, 1927-ah Khawlailung khuaah a piang a. A pa Upa Suakzika , a nu Chawnsiami a ni. Lal kawmthlanga awm an ni a, tlangau Pu Bawihhnuna’n Lalte nen hian kan inau zing em a, a hmingah Lalngurauva ni rawh se tiin a hming hi sak a ni. Pianpui unau paruk (6) mipa 2 leh hmeichhia 4 a nei. A pa kohhran Upa a ni a, ni tin chhungkuain tlaiah tawngtai rualna an nei ziah thin. A pa te unau hian Pathian rawngbawlna an ngaihpawimawh avangin fapa piang hmasa ber ani hi Pathian rawngbawl turin an serh hrang a ni.
February ni 5, 1963-ah Thankimi, Kulikawn nen inneiin fanu pali an nei chungte chu:
1. Margaret Lalrinpari Ralte (L) w/o G.Malsawmdawngliana (L),
2. Dr. Lalrin Tluangi Ralte,
3. Lalrinthangi Ralte w/o Lalneihtluanga,
4. Lalrinzuali Ralte te an ni a, tu pathum a nei bawk. February 5, 2013-ah khan inneih Golden Jubilee an hmang.
Zirna lam leh hnathawh: 1938-ah Lower Primary Khawlailung Primary School atangin Middle Vernacular a zo va. 1945-ah Middle English a zo leh a, 1947-ah Sialsir Private Primary School-ah a thawk a, 1948-ah Synod Stipend hmuin Mizo High School-ah pâwl sarih a zir leh a. Hei hi Pathian thu zir tûra kohhranin a buatsaihna a ni. Kum 1952-ah Matric a pass a, chumi kum atanga 1955 chhûng Cherra-ah L.Th. a zir a, heta a zir lai hian Student Christian Movement-ah a inhmang nasa hle. Kum 1953-a United Church of North India General Assembly, Calcutta-a neihah Assam Synod Thalaite aiawhin a palai. L.Th., a zir zawh hnuin Serampore-ah B.D zir chhunzawm nghâlin 1957-ah a zo va. Eastern Theological College, Jorhat-ah kum hnih a thawk zui nghâl a. World Council of Churches hnuaia Ecumenical Exchange Scholarship hmuin Boston University School of Theology, Boston, Massachussettes U.S.A-ah S.T.M. (Sacrae Theological Magistri - Master of Sacred Theology) 1959-1960 chhûng a zir leh a. Hei bâkah hian zir man hmun lia thena hmun thum awlin thla 13 dang M.A. he University-ah vek hian a zir zui leh a ni.
Kum 1958, Jorhat-a zirtirtu hna a thawh laiin Assam phaia Mizo Kristian awmte enkawl tûrin Pro. Pastor angin hman a ni a. 1959 June-a Special Synod-ah nemngheh a ni ta a ni. 1959-1960 chhûng a zir bo leh avangin Mizorama a rawn haw 1961-ah Mission Vêng Bial vawng tûra ruat nghâl a ni a. Hei bakah hian Aizâwl Theological School-ah zirtirtu hna leh Teacher’s Training School Principal hna chelhtir a ni bawk. 1962 March thlaa Synod High School hawn tharah Headmaster atân lâk a ni a. High School-ah hian 1962-1968 chhûng thawkin January, 1966-ah High School puitlingah Assam sawrkârin a pawm ta a ni.
India Hmârchhak Presbyterian Kohhran Office nghet bun tûrin Administrative Secretary hna March, 1969-July, 1979 chhûng a thawk a. Hemi hma hian Assembly Office nghet neih a la ni lo. Presbyterian Youth Fellowship-ah hian Leader hmasa ber a ni. August 1, 1979-1988 chhûng Mizoram Synod-ah Senior Executive Secretary hna a thawk a, 1989 chhûng Kulikawn Bial vawngin January, 1990 atangin pension-in a châwl ta a ni.
A thawh chhûng hian Synod Moderator, Secretary leh Finance Officer mawhphurhna te a chelh tawh a. Assembly, Chhimphei leh Aizâwl Chhim Presbytery-ah te Moderator hna a chelh tawh a, Mission Vêng Bial K.T.P Leader a ni tawh bawk.
Chanvo hrang hrang a lo chelh tawhte
President leh thildanga nihna a chelhte :
(1) North East Indian Christian Council (NEICC)
(2) North East Auxiliary, BSI
(3) Aizâwl Citizens’ Committee
(4) Aizâwl YMCA
(5) Aizâwl College Governing Board.
(6) Prohibition Sub-Committee, Mizoramah Chairman
(7) Christian Peace Committee Organising Secretary
(8) Mizoram Consumers’ Union dintu leh Treasurer hmasa ber
Member nihnate :
(1) NCCI Board of Christian Literature
(2) NCCI Reorganisation Commission
(3) Serampore College Council
(4) Ludhiana Christian Medical College Governing Board
(5) CWM Executive Committee
(6) Mizo Customary Law Committee
(7) Advisory Board of Education, Mizoram
(8) Selection Board of Central Service Pre-Examination Training Centre NEHU.
Hêng lehkhabute hi a ziak
(1) Rilru leh zir dân kalhmang - 1970
(2) Tirhkohte Thiltih - 1966
(3) Counselling Kaihhruaina (booklet) - 1980
(4) Ka Thlarau Zin Kawng - 1980
(5) The Presbyterian Church of Mizoram - 1989
(6) Nazaret Isua - 1992
(7) Mizoram buai leh Kohhran - 2008
Chanchinbu nitin chhuak leh thlatin chhuakah Articles hrang hrang 21 a ziak.
A pension hnu hian Aizâwl West College ding tirah Principal atân sawm a ni a, May 1990 - February 18,1997 chhûng he hna hi a chelh a. A thawh chhûng hian College hi Degree College-ah hlân kai a ni a, P.U. leh B.A. exam centre nihna pêk nghâl a nih bâkah subject nga (5) laiah Honour course zirtir phalsak a ni bawk.
Hna pawimawh chi hrang hrang a thawh avangin Bial a enkawl meuh lo va, rei lo te chhûng a enkawl a, nupa tuak 61 a inneihtir a, mi 628 a baptis bawk.
A nat dan:
September 5, 2011 khan anxiety disorder vangin Synod Hospital, Durtlang-ah admit a ni a, ni September 23, 2011 khan chhuakin ni 29-ah admit leh a ni a, sodium a tlachham a ni tih an hmu chhuak a. Christian Medical College & Hospital, Vellore ah refer -in, ni 16.11.2011 khan CMC, Vellore-ah admit a ni. Vellore-ah hian “age related dementia” (TAKIN Alzymer) a nei a ni tih hmuh chhuah a ni a; Vellore-ah thla thum zet enkawl a nih hnuin amah pawh a tha chho viau va, June 21, 2012-ah CMC, Vellore-ah Check-up-in a result pawh a tha vek a. Nun kawng pangngai zawh theiin in sawiselna a nei zui lem lo. Mahse kum li hnu August 13, 2016 zanah a taksa a chauh em vangin Bethany Hospital-ah admit a ni a. Kar khat hnuah an chhuak leh a. November 1, 2018 khan BN Hospital ah BP hniam vangin admit leh a ni a, chawlhkar hnihhnuah in lama enkawl turin an chhuak leh a. A taksa a chak tawh loh em avangin heta tang hi chuan khum betin a awm zui ta a ni. Hemi hnu hian a khua sikin a oxygen level a hniam a, in lama enkawl a ni a, mahse a khawsik leh Oxygen level chu a danglam hleih theih loh avangin April 5, 2020 zanah Aizawl Hospital-ah tlan chhoh puiin ICU ah admit leh a ni a. ICU ah hian ni khat leh zan khat a awm hnuin cabin a sawn chhuah a ni a. April 14, 2020 khan in lama enkawl tura chhuah leh a ni.
Kum khat chuang zet in lama enkawl a nih hnu hian August 9, 2021 zanlai 11:30 velah khan thawk lama harsatna neiin a oxygen level a hniam avangin buaipui ngaiin a awm a. Oxygen te pe a enkawl a nih hnuah thawk lama harsatna pawh chu ziaawm in a oxygen level pawh a rawn normal leh a. Ngaih tha taka kan awm laiin August 11, 2021 chawhma dar 10:30 khan a chatuan ram min pan san ta a ni.
VUINA PROGRAMME
A hmun : Mission Vengthlang Kohhran Biak In
A hun : Ni 11.8.2021 (Nilaini) Dar 3:00 PM
Vuitu : Rev. Dr. C. Lalhlira, Moderator, Mizoram Synod
Chanchin sawi : Upa Lalrinmuana, Secretary (Sr.), Mizoram Synod
Thlamuanna thuchah : Rev. Dr. C. Lalhlira, Moderator, Mizoram Synod
Tawngtaisakna : Upa Lalthianghlima, Statistician, Mizoram Synod
Hla KHB 150 : ‘Khawvel hi bo mahse..’ (Rimawi hmanga rem tur)
Malsawmna : Rev. K. Lalrinmawia, Executive Secretary, Mizoram Synod
Thlanmual : Rev. Lalbiaknia, Bialtu Pastor, Mission Vengthlang