PRESCOM Board-in kum hnih chhung a buatsaih, Synod Bookroom Siaha Branch building thar, New Siaha Bazar bul a mi chu Oct. 9, 2021 (Inrinni) zing dar 7:00 khan Rev. Dr. C. Lalhlira, Moderator, Mizoram Synod chuan Pathian hnenah hlanin a hawng.
He Synod Bookroom Siaha Branch building thar hi chhawng 4-a sak niin, kawngpui ân-ah showroom dah a ni a. Showroom zau zawng hi a dung feet 30 a sei niin a vang lam hi feet 27 a zau a ni. Hei bakah hian stockroom leh thawktu chenna a awm nghal bawk.
He Synod Bookroom building thar tur hi October 2020 thla tawp atang khan buatsaih hna thawh tan a ni a. Ngawrh taka kum 1 chhung thawh a nih hnuah hawn theiha peih fel a ni ta a ni.
Synod Bookroom Siaha Branch building thar hawnna inkhawm hi Rev. David Lalrinmawia Sailo, Siaha bialtu Pastor chuan kaihruaiin Synod Bookroom Siaha Branch Committee atangin report ngaihthlak a ni a, Pu Lalniliana, Manager, Synod Bookroom hnen atangin building sak chhoh dan report ngaihthlak a nih hnuah Rev. Dr. C. Lalhlira, Moderator, Mizoram Synod chuan mitin dawr theih turin Synod Bookroom Siaha Branch Building thar hi a hawng ta a ni.