Oct. 26, 2021 (Thawhlehni) chawhnu dar 1 khan Synod Hospital, Durtlang-a College of Nursing building thar hawnna leh Pathian hnena hlanna inkhawm neih a ni.
Building hawnna inkhawm hi Hospital Director Dr. LH Thanga Singson-in a kaihruai a, Mizoram Chief Minister Pu Zoramthanga'n building thar hi a hawng a ni.
Building thar hawn zawh hian Nursing College Hall-ah inkhawm tawi neih nghal a ni a, he hun hi Rev. B. Sangthanga, Executive Secretary i/c Hospital-in a kaihruai a, Dr. Lalbiakmawia Ngente, Architect-in Technical Report a pe a. Synod Moderator Rev. Dr. C. Lalhlira'n thu sawiin Building thar hi Pathian hnena a hlan a, Chief Minister Pu Zoramthanga’n thu a sawi bawk. Upa Lalrinmuana, Synod Secretary leh Hospital Coordinator ni bawkin lawmthu sawiin Rev. Lalramliana Pachuau, Synod Finance Officer-in malsawmnain inkhawm a tin a ni.
College of Nursing Main building sak hna hi Dec. 1, 2017 khan bultan niin Sept. 30, 2021 khan zawh fel a ni a. Ram feet 6,240 bial (sq. ft.) a zau awhin, chhawng li (4) a sak a ni a. A sak hna hi L.B Associates ten an thawk a. Administrative Office, Lecture room, Laboratory, Library, Audio-visual room, Auditorium, Computer lab., etc. awm tura ruahman a ni. Building thar hi North Eastern Council (NEC) atanga sum hmuh Rs. Nuai 833 hmanga sak a ni.