Nov. 7, 2021 (Pathianni) hi Khawvel Sunday School Ni a ni a. Kumin Khawvel Sunday School Ni-ah hian Mizoram Presbyterian Kohhran chuan puitlingah "Sunday School chanchin" Rev. Dr. B. Lalnunzira ziah an zir ang a. Intermediate - Senior-in "John Newton-a chanchin" Upa Hrilthansanga ziah an zir ang a, Beginner - Junior-in "Graham Staines-a chanchin" Rev. Vanlalrova Khiangte ziah an zir ang.
Sunday School hi kum 1780-ah England ram, Gloucester khuaa Robert Raikes-a din a ni a. Dodalna nasa tak hnuaia bul tan ni mah se Sunday School hi mi chanhaiten zirna an dawn theihna hmasa ber a nih avang leh Sunday School kaite nunah danglamna nasa tak an hmuh avangin a darh zau zel a. A tira hmusit taka elsentute ngei chuan, "Robert Raikes-a hian Gloucester khuaa sihal rualte chu beramnoah a chhuah vek a ni," an ti hial a. Pawi khawihna tla hniama jail tang an tlem tak em avangin Gloucester khua leh a chheh vela dan lekkawhtu leh thubuai remtu inzawm khawmte chuan kum 1805-ah Robert Raikes-a hnenah inthurualin lawmthu sawina lehkha an thawn hial a ni.
India ramah July 9, 1803 atangin missionary ropui William Carey-a leh a thiante (Serampore Trio) hma laknain Sunday School neih tan a ni a. Mizoramah pawh Zosap Rev. D.E. Jones-a (Zosaphluia) hma laknain February 20, 1898 atangin mei mit lovin kan nei zui ve ta a ni. Synod Inkhawmpui Vawi 97-na Report-a a lan danin tunah hian MSSU hnuaiah Sunday School 1032, Hotute 4562, Zirtirtu 46866 leh Zirtu 370937 an awm mek a ni.
October 2021 thleng a Sunday School chawimawina hrang hrang te pek tawh dan hetiang hi a ni-
Hming & Dawng Zat
Pi Zaii Award - 20900
Pi Zaii Special Award - 1386
Zalawra Award - 21632
Zalawra Special Award - 1852
Diploma Award - 10235
Jubilee Award - 1339
MSSU Committee (Feb. 16, 1944:5)-in a rel angin Mizoramah chuan kum 1944 atangin Khawvel Sunday School Ni hman tan a ni a, 1949 atangin November Pathianni hmasa berah thupui neia hmang tanin kum 2001 atangin puitling leh naupang lam ten zirlai hran an zir tan a. MSSU Committee (Oct. 24, 2018)-in a rel angin kum 2019 atangin naupang lam chu hmun hnih - Beginner - Junior leh Intermediate - Senior-ah te then a ni.