Mizoram Presbyterian Kohhran chuan kumthar 2022-a Puitling Sunday School zirlaibu tur chu a tichhuak ta.
Presbyterian Kohhran Puitling Sunday School zirlaibu hi Mizo lehkhabu malkhaiah chuan copy chhut chhuah tam ber te an ni thin a. Copies 90,000 zet chhut a ni. Kumthar Puitling Sunday School zirlaibu tur pawh hi 90,000 tho chhut tura ruahman a nih laiin Covid 19 hripui vanga Kohhran inkhawm theih dan ngaichangin copies 70,000 chhut phawt a ni a, boruak awm dan a zirin 20,000 chhut leh theih tura inpeihsa a ni.
Nakkum 2022 hian Mizoram Presbyterian Kohhran chuan Puitling Sunday School-ah "Chanchin Tha Johana Ziak Hrilhfiahna" an zir dawn a. He zirlaibu hi Presbyterian Pastor-te zinga Thuthlung Thar lama mithiam Rev. Dr. PR Hmuaka, Aizawl Theological College-a zirtir hna thawk mek ziah a ni. He zirlaibuah hian zirlai thupui 47 awmin phek 316 zeta chhah a ni bawk. Mizoram puma Synod Bookroom dawr zawng zawngah lei theih tura dah mek a ni a, a chhut man Synod-in 25% a subsidised avangin Rs. 110 chauhin lei theih a ni ang.
Mizoram Presbyterian Kohhran Puitling Sunday School zirlaibu hi Mizoram Synod hnuaia Kohhran zawng zawngte zirlaibu a nih bakah Presbyterian Church of Myanmar (PCM) hnuaia Phai Synod pumpui chuan an zirlaibu atan an hmang ve nghal zel a. Presbyterian Church of Myanmar leh Mizoram Synod Partnership Agreement angin Mizoram Synod chuan kumtin Copy 1000 zet a thlawnin Presbyterian Church of Myanmar hi a pe thin a ni.