Mizorama Pathian thu zirna inpui ber Aizawl Theological College chuan kum tina a lo tih thin angin Nov. 19, 2021 khan College Day vawi 56-na an hmang a. Amaherawhchu kum dang angin a hmuna pun khawm tam theih a nih loh avangin YouTube-a pekchhuah a ni.
College Day hi Synod Moderator Rev. Dr. C. Lalhlira'n hmanpuiin inkhawm a kaihruai a, ATC Principal Rev. Prof. Vanlalnghaka Ralte-in report a pe a, report-a a lan dan chuan tun dinhmunah zirtirtu thawk nghet 23 leh contract-a rawih 2 an awm a, Office-a thawk mi 16 awmin contract-a rawih 2 an awm bawk. Zirlai zawng zawng 171 an ni a, heng zingah hian BD zirlai 109, M.Th zirlai 56, D.Th zir mek 6 an awm.
Kumin 2021 College Day thupui, "Challenges to the Christian Mission in the Post Covid-19 Global Scenario: Aspects from German Context" tih chu Rev. Dr. Anton Knuth, Director, Mission Akademie, Hamburg, Germany chuan Online hmangin a sawi a. India ram chhung leh pawn atangin chibai bukna thu ngaihthlak a ni bawk. ATC Male Quartet leh ATC Female Quartet ten Pathian fakna hla an sa a. Kum 2020-2021 chhunga zirlai tithate hnenah Rev. Lianhmingthanga Sailo, Senior Executive Secretary i/c Theological Education chuan lawmman chi hrang hrang a sem a. Synod Secretary (Sr), Upa Lalrinmuana pawhin zirlai tithate hnenah "Proficiency Prize" a sem bakah kumin atanga lawmman siam thar "Church Music Prize" chu a sem bawk.
ATC Faculty-in Literary Project an neih pathum zinga puitling hmasa ber "KULHBING" tih lehkhabu chu Rev. Lianhmingthanga Sailo, Senior Executive Secretary-in a tlangzarh nghal a. He lehkhabuah hian Mizo Kristiante nektu chhanna thuziak 31 a awm a, phek 400 a chhah niin Rs. 400/- man a ni.
Rev. Dr. H. Lalrinthanga, Dean, Post Graduate Studies chuan lawmthu sawiin Rev. K. Lungmuana'n malsawmnain College Day lawmna hi a khar a ni.
College Day-a lawmman sem chhuah zinga ngaihhlut hlawh ber pakhat, "Best Outgoing Student Award" chu R. Laltlanchhungi, East Lungdar hnenah hlan a ni.
Covid-19 hrileng avangin online-in class kalpui a la ni a. ATC-ah hian Senate of Serampore hnuaia zir theih course chi hrang hrangte hawn kim deuh thaw tawh niin tunah hian Old Testament leh Christian Counselling-ah D.Th zirna hawn tuma hmalak mek a ni. Kum kal ta chhung khan ATC zirtirtu mi panga (5) te chuan Doctorate Degree an hmu thar bawk.