Vawiin (Nov. 26, 2021) hi Kohhran Hmeichhe Ni vawi 25-na a ni a, hripui leng avanga kum danga hman thin ang chuan hman hleih theih a ni lo.
Amaherawhchu, sorkar-in inkaihruaina a siam zui chungin a theih ang angin Kohhran Hmechhiaten he an Ni pawimawh hi hmangin "Ruth Bell Graham-i Chanchin" Pi H. Lalfakmawii, Kohhran Hmeichhe Co-ordinator ziah an zirho ang.
Kum 1997 atang khan Mizoram Presbyterian Kohhran Hmeichhiate chuan November zirtawpni hnuhnung ber hi Kohhran Hmeichhe Ni atan an hmang thin a. Kohhran Hmeichhia hi Zosap Missionary Rev. DE Jones-a nupui Mrs. Catherine Ellen Williams (Pi Zosaphluii)-in kum 1904-ah a din a. Mizo hmeichhia, a bik takin nu te chu Pathian thu te hrilhin, kut themthiam leh hriselna lam te a zirtir a. Khasi nu Pi Siniboni pawh amah puitu tangkai tak a ni a, hun kal zelah Bible Women-te nen thawk hovin Kohhran tinah Kohhran Hmeichhia a lo ding zel a ni.
Kohhran Hmeichhe Ni atan November zirtawpni hnuhnung ber hman a nih chhan hi Pu Zosaphluia'n a diary-ah Pi Hluii'n zirtawpniah Hmeichhiate chu inkhawm a neihpui thin tih a ziak a. Inkhawm a neihpui tan ni chiah hi sawi lan a ni lo va, January 1904-ah Mizorama lo chhuak kha a ni a. A lo chhuah kum tawp lamah chuan Hmeichhiate hi bul a tanpui tawh ngei ang tih a rin theih a. Chuvangin Pi Zosaphluii Mizorama a lo chhuah kum tawp lam November zirtawpni hnuhnung ber chu Kohhran Hmeichhe Ni a hman turin Synod Executive Committee (SEC)-ah rawtna a thlen a. SEC chuan remtiin kum 1997 atang khan hman a ni ta a. Kum 1904 chu Kohhran Hmeichhe din tan kumah pawm a ni nghal bawk.