Vawiin December 2, 2021 (Ningani) chawhma dar 11-ah khan Aizawl Theological College Chapel-ah Didakhe chanchinbu kum 50 (Golden Jubilee) tlin lawmna hun hman a ni.
He programme, ATC Principal Rev. Prof. Vanlalnghaka Ralte kaihhruaiah hian ATC Registrar, tuna Didakhe Editor ni mek Rev. Prof. Tlanghmingthanga'n inhmelhriattirna neiin report a pe a. Rev. Prof. L.H. Rawsea'n Jubilee tawngtaina a hman zawhah Synod Moderator Rev. Dr. C. Lalhlira'n thuchah sawiin Golden Jubilee puala chhuah Didakhe Special Issue a tlangzarh a. Rev. Dr. Zaihmingthanga, Revd Chuauthuama, Rev. Dr. H. Vanlalauva leh Pu Thankima (Librarian) ten thu ngaihawm tak tak an sawi bawk. Tawngṭai rualna neih a nih hnuah inkhawm hi Rev. J.H. Zaikima, Leitan Bialtu Pastor-in malsawmnain a tin. Chapel-a programme hman zawhah hian ATC Quadrangle-ah Didakhe Documentary chhuah a ni bawk.
Didakhe Golden Jubilee lawmnaah hian ATC faculty, Staff leh zirlai eng emaw zat bakah Didakhe enkawltu hmasa mi eng emaw zat an tel a. Kum 37 lai Didakhe Agent-a lo tang tawh Pu H. Sangzawna, Tuikual North a tel bawk. Didakhe hi kum 1972 kum tir lama chhuah tan a ni a, a thupui chu "Zir la, Hril la, Zirtir rawh" tih a ni.
