Mizo Bible Zirna (Mizo Study Bible), Synod Literature & Publication Board-in a buatsaih chu vawiin chawhma dar 10:30 khan J.M. Lloyd Hall, Synod Office-ah tlângzarh a ni.
Lehkhabu tlângzarh inkhâwm hi Rev. B. Sângthanga, Executive Secretary i/c SL&PB, etc-in a kaihruai a, Pu Zohmingliana Colney, Joint Editor-in lehkhabu chanchin a sawi a, Rev. Lianhmingthanga Sailo, Senior Executive Secretary-in a tlângzarh a ni. Mizo Study Bible hi Rs.1,400/- man a ni a, Synod Bookroom-ah zawrhchhuah zui nghâl a ni.
Synod Literature & Publication Board chuan Mizo tawng ngeia Study Bible neih hi thain a hria a. Chutih lai chuan Bible Society of India Mizoram Auxiliary chuan Mizo Study Bible an rawn tichhuak ta a. That pawh a tha a, a tangkai hle. Bible Society lamin lo siam tawh pawh ni se, SL&PB chuan Kohhran tâna rohlu tak a nih dâwn avângin Bible pumpui hi Mizo tawng ngeia zirna (Mizo Study Bible) chu siam ve ngei tûlin a hria a. SL&PB Board/BEC chuan a buaipuitu tûrte a ruat a. Sub-Committee chuan March 27, 2015 khân a ziaktu tûr mi 66 a ruat a. Chûng a ruatchhuah te chu Board thukhawmin a pawm hnuah anmahni dâwrzuiin hrilhfiahna ziah dân tûr kaihhruaina te a thawn nghâl a, theihtâwpin hma a la zui a, heti hian a lo chhhuak thei ta a ni.
Mizo Bible Zirna innghahnân hianThe NIV Study Bible te, The Harper Collins Study Bible te leh The ESV Study Bible te thlanchhuah an ni a. A buatsaihna kawngah hian hêng Study Bible pathumte hi a tangkai thei ang bera râwn tawn thin a ni.