Mizoram Presbyterian Kohhran hnuaia Committee sang ber, Synod Executive Committee vawi 296-na, ni thum chhung awh tur chu Synod Office-a JM Lloyd Hall-ah vawiin (Feb. 22, 2022) chawhma dar 10 atang khan a thu tan a, Aizawl khawpui chhung atangin member 44 leh Aizawl khawpui pawn atangin member 87, an vaiin member 131 an kal thei.
Committee hi Synod Moderator Rev. Dr. Vanlalnghaka Ralte-in a kaihruai a, SEC Committee member term hmang zo leh lut thar tur inthlakna tihfel hmasak a ni a, Board leh Committee danga inthlak ngaite pawh tihfel zui a ni a, Inneih theihna kawltu thlak/ruat an ni bawk. Synod Secretary-in reports a pe a, Finance Reports ngaihthlak a ni bawk.
Synod Secretary Rev. Z.D. Lalhmachhuana chuan Synod Executive Committee hmasa leh tun inkar-a thil thleng larsar zual report a pe a, Covid-19 hripui leng avangin kum 2021 Synod Inkhawmpui vawi 98-na chu ruahman lawk anga programme hman vek theih a ni lova, Sawrkar lam SOP zawm chungin tluang takin December 3-12, 2021 khan Republic Veng Kohhran Biak Inah Republic Veng Bialin an thlen thu te, Synod 2021 thurel angin January 8, 2022 khan Pastor Bial thar 3 hawn a nih thu te, January 9, 2022 khan Pastor leh Pro. Pastor Induction tluang taka neih a nih thu leh covid-19 hrikai 4 chu hun dangah induction neihpui an nih thu te, kum 2021 Synod Inkhawmpuiin Deapartment hrang hrang hotu a ruat tharten an hna an zawm fel thu te, OM thurel angin Rev. Dr. C. Lalhlira, Leitan South chuan Partnership Secretary hna Synod Office-a a zawm thu te, Synod Service Board-in Contract Missionary 50 a lak thar thu leh Missionary Training College-ah Residential Orientation/Training neihpui an nih thu te, Manipur Area Pastor-te puala Intensive Residential Pastoral Care & Counselling Batch hmasa ber chu Dec. 16-22, 2021 khan Manipur Area Office-ah neih a nih thu te, January 27, 2022 khan Baptist Church of Mizoram (BCM) hotute leh OM member-te Kohhran Inpumkhatna thu sawia inkawmhona, Synod Officers’ Room-ah neih a nih thu te, February 1-4, 2022 chhung khan Synod Conference Centre-ah Pro. Pastor Orientation neih a nih thu te, Pi Seiziki w/o T. Darliana (L), Tlangnuam chuan Tlangnuama an in luahlai chu Synod Endowment Fund atan a pek chu February 3, 2022 khan LSC dawngin inhlanna pawh ziah fel a nih thu te, Synod Hospital-a Khualbuk, mipa 16 leh hmeichhia 14 riahna awm chu hman theih turin peih fel a nih thu te, USA-a tlawmngai pawl pakhat, Programme for Appropriate Technology in Health (PATH) India hnen atanga dawn, Oxygen siamna khawl Pressure Swing Absorbtion (PSA), cheng nuai 130 man lai chu hman theiha buatsaih fel a nih thu te, kum 2022 January thla chhungin Mission Field hrang hrangah ringthar 1103 an awm thu te, Mission Development Training Centre (MDTC), Bualpui North-ah Veterinary Clinic building thar chu February 9, 2022 khan Rev. Dr. K. Lallawmzuala, Executive Secretary i/c Mission in a hawn thu te, kum 2022-a KTP General Conference, March 3-6, 2022 chhunga Kolasib a neih tur chu Covid-19 hripui leng avangin Central KTP Committee chuan OM remtihnain May 5-8, 2022 a hman tura a rel thu te, kum 2022 Kohhran Hmeichhe Rorel Inkhawm, March 11-13, 2022 chhunga Mission Veng Kohhrana neih tur pawh Covid-19 hripui leng avangin OM remtihnain Central Kohhran Hmeichhe Committee chuan May 26, 2022 a neih turin a rel thu te, SEC 294 (Nov. 25, 2021) leh tun SEC inkarah Synod Relief Fund atangin damlo/rethei etc. hnenah Rs. 3,79,000/- sem an nih thu te leh Revocation Certificate (RC) mi 66 leh Re-marriage License (RL) mi 92 hnenah pek an nih thu te chu report langsar zualte an ni.
Rev. Hesei Vaiphei, Manipur Area, Leilon Pastor Bial vawngtu chu Cancer natna avangin December 15, 2021 khan a thi a, Synod Moderator aiawhin Rev. R. Lalhmingsanga, Administrative Secretary, Manipur Area-in Biak Inah a vui thu report a ni bawk.
Tun tumah hian thu ngaihtuah tur pawimawh 49 zet chhawpchhuah a ni a, chung zingah chuan Central KTP Leader thlan & General Secretary ruat chungchang te, Mizoram Christian College (MCC) Principal thlanna te, Synod Multipurpose Training Centre-a Skill Development Course kalpui mekte en that chungchang te, a tul leh mamawh bik te tan Kohhran mal hminga sawrkara Registration neih theih dan kawng zawn chungchang te, Kohhran Inkhawm leh Inkhawm dangte tihtlem dan ngaihtuah chungchang te, Zirnain hma a sawn theih nana Sawrkar leh Synod thawh ho dan zawn rawtna te, Act East Policy Synod-in lo zir chianga hma lak rawtna te, Synod-in Kohhran hmathlir research base-a neih rawtna te, Synfo Department tih chaka tihchangtlun chungchang te, Kristian ni pawimawh humhalh tura hmalak chungchang te, Pastor Pension-te politics-a an inhman dan tur inkaihhruaina chungchang te, Synod Service Rules 2018 Enthatna (2021) chungchang te, Presbyterian English School (PES) din tan kum tihchian rawtna te leh Myanmar ram buai avanga Mizorama raltlante Synod hminga tanpui rawtna te chu a langsar zual an ni.