February 21, 2022 (Thawhtanni) khan Mizoram Presbyterian Kohhran hruaitute leh Mizoram Governor Pu Hari Babu Kambhampati ten Raj Bhavan-ah inkawmhona hun an hmang a, mipui vantlang tana hmalakna tangkai tur leh tunlai Mizoram chhunga thil thleng pawimawh deuh te an sawiho.
Governor chuan Mizoram chhunga Kohhran leh Tlawmngai pawl hrang hrang ten mipui vantlang hmasawnna atana sawrkar tha taka an thawhpui thin avang te, anmahni senso nena state hmasawnna atan an luangchhuak thin chu state danga NGO leh sakhaw dang vuantute tan pawha entawn tlak leh chhuanawm a ni tih a sawi a. Hripui leng avanga harsatna a thlen lai te, buaina lian tham deuh a thlen chang te, sakhaw hrang hrang betute inkarah inunau na a awm theih na atan leh mi harsa te tanpui kawngah Kohhran ten theih tawp an chhuah thin chu ropui a tih thu sawiin sawrkar an thlawpnaah lawmthu a sawi bawk.
Mizoram Synod hruaitute chuan Mizoram sawrkar leh Kohhrante chu englai pawha Mizoram hmasawnna tura lungrual taka thawkho thin an ni tih Governor hnenah hian an sawi a. Mizoram chhunga remna leh muanna a awm theihna atan te, zirna tih hmasawnna, inthlanna thianghlim a awm theihna tura hmalaknaah te, mipui vantlang tana luanchhuah kawngah leh sawrkar thlawp a ngaihna laiah te kohhran ten theih tawp an chhuah chhunzawm zel tih an sawi a ni.