Vawiin (Feb. 28, 2022) chawhma dar 11 khan Synod Mission Board hnuaia thawk tur Missionary lak tharte tana Missionary Pre-Service Orientation Training neih mek chu Missionary Training College (MTC) Chapel-ah kharna hun hman a ni.
He kharna hun hi Rev. Dr. C. Lalramchhana, Principal, Missionary Training College in kaihruaiin tanna hun a hmang a, Pi Vanlalthawmi, Dean of Training hnen atangin Training Report ngaihthlak a ni. Rev. Lalhmingsanga, Synod Mission Board Secretary in thuchah a sawi a, Missionary lak tharte aiawhin Vanlalhuthangi Sailo-in thusawina hun a hmang a, a duh apiang tan thusawina hun hawn a ni. Mal zai, Vanlalnunmawii hnen atangin ngaihthlak a ni a, trainee-ten Musical Drama an entir bawk. Upa Lalbiakenga Fanai, Synod Mission Board Coordinator-in thu pawimawh puanna leh lawmthu sawina hun a hmang.
Missionary lak thar te hi mi 50, mipa 18 leh hmeichhia 32 an ni a, Evangelist 30, Evangelist Teacher 15, Medical 3, Asst. Professor 1 leh Lecturer 1 an ni. February 3, 2022 atang khan Missionary Training College (MTC), Mission Vengthlangah Orientation training hi an nei a, training-ah hian an rawngbawl dan tur kal hmang te, an awmna tur chanchin te leh thil pawimawh hrang hrangte an zir a ni.
Naktuk (March 1, 2022) chawhma dar 11:00-ah Missionary-te tirhchhuahna programme, Missionary Training College (MTC) Chapel-ah neih a ni dawn a, Synod Moderator Rev. Dr. Vanlalnghaka Ralte in thuchah sawiin tirhchhuahna hun a hmang ang.