Vawiin (March 1, 2022) chawhma dar 11 khan Synod Mission Board hnuaia thawk tur Missionary tirhchhuah inkhawm, Missionary Training College Chapel, Mission Vengthlangah neih a ni.

Tirhchhuah inkhawm hi Rev. R. Lalhmingsanga, Secretary, Synod Mission Board-in a kaihruai a, Upa Lalbiakenga Fanai, Coordinator, Synod Mission Board-in Missionary tirhchhuahte chanchin a sawi a, Synod Moderator Rev. Dr. Vanlalnghaka Ralte in tirhchhuahna hun hmangin thuchah a sawi. Tirhchhuahte aiawhin Lalhruaitluanga’n thu a sawi a, Pi Vanlalthawmi, Dean of Training, MTC-in training report a pe bawk.

Rev. C. Chawngliana, Board Executive Committee member-in Missionary tirhchhuahte tawngtaisakna hun a hmang.

Missionary tirhchhuahte hi mipa 18 leh hmeichhia 32, an vaiin mi 50 an ni a, Evangelist 30, Evangelist Teacher 15, Medical 3, Asst. Professor 1 leh Lecturer 1 an ni. February 3, 2022 atang khan Missionary Training College (MTC), Mission Vengthlangah Orientation training hi an nei a, training-ah hian Missionary Training College faculty mi 16, Synod Mission Board atangin mi 7 leh pawn lam mi 8 bakah, tawng zirtirtu atan mi 9, Job Orientation atan mi 3 leh Field orientation atan mi 9 ten missionary-te rawngbawl dan tur kal hmang te, an awmna tur chanchin te leh thil pawimawh hrang hrangte an zirtir a ni.  

Missionary Pre-Service Orientation hi kum thum hma lam kha chuan lânga buatsaih thin a ni a, kum 2020 atangin riak luta neih a ni ta a. Tun tum hi riak luta neih vawi thumna a ni. Missionary tirhchhuah inkhawm hi Synod Mission Board Headquarters thawktute, Board Executive Committee member-te leh MTC Faculty member-ten an hmanpui a ni.