Vawiin (March 3, 2022) khan Synod Hospital Durtlang chuan World Hearing Day 2022 denchhenin Dr. Fraser's Clinic leh Mission Veng Kohhran Centenary Hall-ah Beng, Hnar, Hrawk leh Mit (ENT & EYE) lama harsatna hrang hrang neite tan free clinic neih a ni a, CBM India leh Synod Hospital tangkawpin an buatsaih a ni. 

Free Clinic tan hma hian Pathian hnena inhlanna leh free clinic buatsaih a nih dan te sawiin hun hman a ni a, inentirna hun neih chhunzawm nghalin Dr. Samuel Lalhruaitluanga, ENT, Dr. Lalramengmawii, Opthalmologist leh Synod Hospital thawktuten damlo te hi an endik a ni.

He free clinic hi mipuiin an hlut hle a, a tawp thlenga mit leh ENT lama inentir hi mi 165 ve ve an ni. 

World Hearing Day hi kum tin March 3-ah hman thin a ni a, kum tinin he ni pual hian thupui thlan bik neiin khawvel hmun hrang hrangah hman thin a ni.

Kumina World Hearing Day-in a tum ber chu ri hriatna tha hun rei tak chhung kan neih theih nana kan nitin nun dan leh kan chhehvel thil tam tak lak atanga kan inven that hi a ni a, ri hriatna tha lo hriat chhuah hma leh a hma thei ang bera enkawlna dawn hi a ni.

Tun dinhmunah Synod Hospital, Durtlangin beng ri hriatna that leh that loh enna khawl a neih mek te lo tarlang ila :-

1. Oto Acoustic Emission (OAE) : OAE khawl hmang hian second 10 vel chhung lekin nausen piang hlim atanga puitling ri hriatna that leh that loh a hriat theih a ni.
2. Auditory Brainstem Response/ Brainstem Evoked Response Auditory (ABR/ BERA) : He khawl hmang hian nausen piang hlim atanga puitling ri hriatna thazam (nerve) that leh that loh, hun reilo te chhungin a hriat theih a ni.
3. Pure Tone Audiometry : He khawl hi beng ri hriatna enna khawl tlanglawn ber a ni.
4. Tympanometry : He khawl hi beng dar chhung lama fello awmte enfiahna khawl a ni.

Heng khawlte hmang hian Synod Hospital-ah kar tin ENT Doctor-te OPD-a an thut ni apiangin Hearing Screening Test tih theih reng a ni.