Nimin (March 7, 2022) chawhu khan Synod Prison Ministry Committee chu I.G. Prisons Office-ah lengin inkawmhona hun tha tak an nei.
Synod Prison Ministry Committee-te hi Rev. Dr. K. Lallawmzuala, Executive Secretary i/c Prison Ministry leh Rev. Lalhmuchhuaka, Director hovin an kal a, Pi Zarzokimi, I.G. Prisons leh Pi Jennifer Chongthu, Superintendent, Prisons-in an lo dawngsawng a ni.
He hunah hian jail chu misual hremna hmun ni lovin, an lo chhuah leh hunah pawh an khua leh vengte tana khua leh tui tha, an lawina Kohhrana mi hman tlak an nih theihna turin; tisa leh thlarau lamah enkawl puitlina, chher chhuahna hmun Correction Centre a nih zawkzia te, a hlawhtlin theihna turin kut themthiamna lam thil (Vocational Training) tih theih leh remchang apiang an tih theihna tura Training Centre din sak a tul thu leh hmalak dan tur te, Kohhran leh khawtlangin jail tangte hi en tleu mai lovin, nun kawng dik leh tha an zawh hlen ve theih tawhna tura kan mawhphurhna inzirtir nasat lehzual tul an tih thu te, Sawrkar leh kohhran mawhphurhna leh tih tur nia an hriatte sawi hovin, hmalak zel dan tur leh kut intihchaksak tawn dan tur tha an tih te inpawh takin an sawi ho a, Rev. H. Laltlanthanga, Armed Veng Bialtu Pastor-in tawngtaiin a tin a ni.
Synod Prison Ministry Committee chuan hun tha tak siama inlenga sawmtu Pi Zarzokimi, I.G. Prisons leh Pi Jennifer Chongthu, Superintendent chungah lawmthu an sawi.