Mizoram Synod, Family Guidance & Counselling Centre (FG&CC)-in Kohhran hruaitute puala February 24, 2022 atanga Synod Conference Centre-a 'Church Leaders' Intensive Residential Pastoral Care & Counselling Training' vawi 33-na a buatsaih chu March 7, 2022 (Thawhtan) zan khan ‘Final Evaluation & Graduation Service’ neiin khar a ni.
Training kharna hun hi Rev. Lalsangbera, FG&CC Director-in a kaihhruai a, Rev. Dr. Vanlalnghaka Ralte, Synod Moderator-in training chhuakte hnenah Certificate semin thuchah a sawi. He Counselling Training-ah hian Aizawl khawpui chhunga Pastor Bial 9 atangin Kohhran aiawh 21 an tel a ni.
Training kharna inkhawmah hian Training chhuakte chuan an hlawkpui dan a lema an ziak chu entirin an hrilhfiah a, Upa F. Vanlalbuanga, Bethlehem Venglai North chuan training chhuakte aiawhin thu a sawi a, Upa Andrew Lalherliana, Com. Member, FG&CC chuan Training chhuakte a tawngtaisak a ni.
Thuchah sawitu, Synod Moderator Rev. Dr. Vanlalnghaka Ralte chuan "Counselling hi mi tin mamawh a ni a, Mizoramah pawh a pawimawhna kan hre chho ta zel a, a lawmawm hle. Counselling hi Lal Isua hna kan thawhpuina pawimawh tak a ni a, kan ramah harsatna tawk mi tam tak an awm a, an la awm zel dawn bawk a ni. Hemi vang hian Synod pawhin a ngai pawimawh a, Counselling lam zirna sang zawk pawh a siam belh zel a ni." a ti a. Training chhuak tharte chu an thil zirte midang tana tangkai taka hmang zui turin a fuih a ni.
FG&CC hian Pastoral Care & Counselling Training hi Pastor-te pualin vawi 28 buatsaih tawhin, Pastor 479 training a neihpui tawh a. Church Leader-te puala kum 2002 atanga training vawi 33 a neihpui tawhah Kohhran hruaitu 690 Training pek an ni tawh bawk a ni.
Synod hian Counselling Centre pakua - Mission Veng, Bawngkawn, Vaivakawn, Champhai, Serchhip, Kolasib, Lunglei, Mamit leh Khawzawlah te a nei a. Heng Counselling Centre pakuaah hian tun thlenga pantu (Client) an neih tawh zat chu mi 42,804 an ni.