Vawiin (March 8, 2022) chawhnu dar 2 khan Synod Worship Committee chuan zirna kalpui leh theih huna hman nghal turin Synod Music School, Bawngkawn Kohhran Hall-ah an hawng.
Synod Music School hawnna inkhawm hi Rev. Dr. K. Lallawmzuala, Executive Secretary i/c Worship-in a kaihruai a. Rev. Dr. Vanlalnghaka Ralte, Synod Moderator-in thuchah sawiin Music School hi a hawng a. Upa H. Lalhmingmawia, Co-ordinator, Worship chuan report pein “Synod Music School Branch an hawn chu kum 2019 Synod rorel bawhzuina a nih thu leh Class tan a nih theih hunah zing karah Tonic Solfa leh Staff Notation zirtir tum a nih thu” a sawi a. “Class hi Bawngkawn Kohhran Hall-ah neih a nih tur thu leh Synod Music Instructor-ten an zirtir thin tur thu” a sawi bawk.
Music School hawnna inkhawmah hian Rev. K. Lalrinmawia, Bawngkawn Bialtu Pastor leh Bawngkawn Kohhran Chairman ni bawk pawhin thu sawiin, Tv. Victor Lalbiaktluanga, Bawngkawn-in Pathian fakna hla a sa a ni.
Synod Worship Committee-in Bawngkawn-a Synod Music School a hawnah hian zing dar 6:30-7:30 chhungin class neih thin a ni ang a. Zir tan theih hun tur sawi lawk theih loh mahse, zir dil duhte tan tunah hian dil theih a ni a. March ni 30, 2022 thleng hun hawn a nih thu Synod Worship hruaitute chuan an sawi. Synod Music School-a Tonic Solfa leh Staff Notation Intermediate Course hi thla thum chhung zir tura tih a ni.
He School hawnnaah hian Synod Worship Executive Committee te, Synod Music Instructor te, Bawngkawn Kohhran Committee te, Aizawl Hmar Presbytery Puipate, Bawngkawn Bial Standing Committee te, Bawngkawn Branch K.T.P. Office Bearer te leh Bawngkawn Kohhran Hmeichhia leh Bawngkawn Kohhran Pavalai Pawl Chairman & Secretary te ve ve an tel a ni.