Vawiin (March 15, 2022) hi Mizorama Chanchin Tha thlen Ni champha a ni. Hemi ni pual hian zan inkhawm programme siam a ni a, thupui inang tlang zir tura tih a ni. Nilenga hmang thei Kohhran tan pawh mahni Kohhran remchan anga ruahman mai tur a ni.
Zan inkhawm thupui : “Chanchin Tha - Malsawmna thlentu”, Matthaia 6:31-34; Johana 1:47-51; Ephesi 1:18-23
Chanchin Tha Thlen Ni atan hian kum 2014 hma lamah chuan Rev. J.H. Lorrain (Pu Buanga) leh Rev. F.W. Savidge (Sâp Upa) ten Mizoram an lo luh ni, January 11 hman thin a ni a. Kum 2012 Synod Inkhawmpui chuan Rev. William Williams-a’n Mizoram a lo luh ni, March ni 15, 1891 chu Mizorama Chanchin Tha lo thlen ni atan a pawm a ni.
Rev. William Williams hi Khasi rama Welsh missionary a ni a, Mizote chanchin a hriatin Mizote zinga Chanchin Tha hril a duh hle a, Mizote zingah missionary ni tura a lo kal thei lo chungin Mizoram tlawh hram a tum a, Silchar D.C remruatpuinain Sipaiho ruala lo kalin Mizoram a rawn lut a, a hmasa ber atan Mizote zingah Krista Chanchin Tha a rawn puang ta a. Synod 2012-in a rel angin Rev. William Williams-a’n Mizoram a rawn thlen ni (March 15) hi Mizoram Presbyterian Kohhran te chuan Mizorama Chanchin Tha lo thlen ni atan kum 2014 atangin a hmang ta a ni.