Synod Multipurpose Training Centre buatsaih Lay Leaders Training vawi 212-na kharna inkhawm chu nizan (March 24, 2022) khan neih a ni. 

 

Training kharna inkhawm hi SMTC Hall-ah neih niin Rev. Lalrinthara, Programme Director-in programme a kaihruai a. Synod Moderator Rev. Dr. Vanlalnghaka Ralte in thuchah sawiin trainee-te hnenah Certificate a hlan. Trainee-te tana tawngtaisakna hi Resource person aiawhin Rev. C. Chawngliana’n a hmang a, trainees aiawhin Upa Vanlalphena’n lawmthu a sawi a, Rev. Vanlalzuata, Resource person-in lawmthu a sawi bawk. Kharna hunah hian Nl. Lalremruati Hnamte in fakna hla sain hun a hmang bawk.

Tun tumah hian Presbytery 4- Aizawl West I, Aizawl West II, Aizawl Bethel leh Aizawl Hmarchhak Presbytery atangin Kohhran Upa 34 an tel thei a ni. Training-ah hian Resource person atan Rev. Vanlalzuata, Rev. C. Chawngliana, Rev. T.C. Laltlanzova, Rev. F. Lalrinnunga, Rev. Lalrinthara leh Upa Lalsawmliana te hman an ni. 

Synod Multipurpose Training Centre hi a din kum, 1996 atangin Lay Leaders’ Training - Kohhran Upate Training hi kalpui chhoh char char a ni a, SMTC Office record-a a landan chuan tunah hian Kohhran Upa mi 1300 chuang zet training neihpui tawh a ni a, Covid-19 pandemic avangin kum 2019 leh 2020 chhung khan training koh mumal theih a ni lova, tunah hian training tura koh hmabak, Kohhran Upa mi 400 chuang an la awm a ni.

SMTC-ah hian Ministerial training leh Vocational training kalpui a ni a, Vocational training hi kum tluana neih a ni a, tunah hian trade chi hrang hrang 5 neih mek a ni a, kumin July thla hian trade 2, Welding & Fabrication leh Electric Wiring & Repairing hawn thar tur a ni bawk. 

For more Pics Click Here