April 9, 2022 (Inrinni) khan Mizoram Synod Moderator Rev. Dr.Vanlalnghaka Ralte chuan Calcutta Mission Feld Church Court a hawng.
Church Court hawnna inkhawm hi Bishop’s College, AJC Bose Road, Beckbagan, Kolkata-ah neih a ni a, Mizoram Synod Moderator Rev.Dr. Vanlalnghaka Ralte in kaihruaiin Calcutta Mission Field Church Court leh hriatrengna thuziak a hawng nghal a, thuchah a sawi bawk. Rev. R. Lalhmingsanga, Secretary, Synod Mission Board hnen atangin thusawi ngaihthlak a ni a, Rev. J.C. Lalramliana, Field Secretary, Calcutta Mission Field hnen atangin Field report ngaihthlak a ni bawk. Programme hman zawhah hian Church Court hawn lawmna ruai an kilho nghal a ni.
Calcutta Mission Field hi kum 1988 a din a ni a, tunah hian Pastor bial 8 a awm a, Field Secretary 1, Pastor 8, Missionary 58 leh Field Workers 192 ten rawng an bawl mek a, Craft centre 7 leh non formal School 65 kal tlanga Chanchin Tha hrilh mek a ni bawk. Kohhran member 9250 an awm mek bawk a ni.
Calcutta Mission Field in a kum 34 naah Church Court a hawng thei hi Field tan leh Kohhran tan mellung pawimawh tak a ni a, a lawmawm tak zet a ni.