Nimin (April 11, 2022) khan Mizoram Synod Moderator Rev. Dr.Vanlalnghaka Ralte chuan Jharkhand Mission Field-ah Church Court a hawng.
Church Court hawnna inkhawmah hian Rev. Dr. C. Lalthanzara, Field Secretary-in Field Report a pe a, Church Court chungchang Rev. R. Lalhmingsanga, Secretary, Synod Mission Board-in a sawi a. Synod Moderator Rev. Dr. Vanlalnghaka Ralte hnen atangin thuchah ngaithlak a ni. Kohhran Zaipawl pathum an zai bawk.
Church Court hawnna inkhawm hi a ram miten an hlut hle a, mi 500 vel pungkhawm tura beisei an nih laiin, mi 1000 chuang lai he hun ngaipawimawh hian an rawn kal khawm a ni. Kolkata atangin Field Secretary, Mizo Presbyterian Kohhran Pastor leh O/A ten an hmanpui bawk.
Jharkhand ram hi India hmar lam ram, West Bengal, Odhisa, leh Bihar-ten an rina laia awm a ni a, a ram hi 74,677 Sq.km. a zau a ni. November 15, 2000 khan Bihar atangin a indang ve chauh a, a khawpui ber chu Ranchi a ni. A ram leilung pawh a hausa hle a, thil laihchhuah chi - Lungalhthei, Iron Ore, etc. tam tak awmna a ni. Kum 2021 - 2022 thlenga record-ah chuan Jharkhand-ah hian mihring maktaduai 39 (3.9 crores) lai an awm a. Dumka District-ah hian mihring 1,475,112 an awm bawk a, Dumka khawpui chhungah hian mihring 2,61,373 vel an awm thung. Jharkhand State-ah hian Santal 2,752,723 (2018) an awm.
Mizoram Presbyterian Kohhran chuan Jharkhand-ah hian Laipuitlang Kohhran hmalakna-in kum 1986 atang khan rawngbawl hna a lo tan tawh a. A tirah chuan Laipuitlang Kohhran enkawl Santal Christian Fellowship a awm te zing atangin an chipuite hnena Chanchin Tha hril tûr an tîrchhuak thin a. Kum 1989 atang khan Missionary intîrin ringthar an siam a, chûng an ringthar neihte enkawl leh an hmalâkna umzuiin Synod Mission Board (SMB) chuan kum 1998 khan (hemi kum Synod Inkhawmpuiah pawm a ni) a la ta a ni.
Jharkhand Mission Field hawn a nih hma hian Patna Mission Field hnuaiah kum kua (1999-2007) a awm hman a. Hawn a nih lai hian Pastor Bial pathum: Dumka, Jugia leh Kathikund Pastor Bial a awm a, member 2500 vel an ni.
Jharkhand Mission Field hi Synod Mission Board-in a lak hnuah April 1, 2008 khan hawn a ni a, tunah hian kum 14 a tling ve tawh a ni. Tunah hian Dumka, Jamtara, Dhanbad, Pakur leh Godda-a Santal, Pahari hnam zingah leh Khuntidist-a Mundari hnam zingah rawngbawl thin a ni a. Santal Parganas-ah hian District pasarih awmin hmun 106-ah Fellowship inkhawmna pangngai kalpui mek a ni a. Rawngbawlnain hma sawn ve zelin Kohhran member pawh an pung chho ve zel a ni.