Mizoram Sorkar-in April 5, 2022 atanga zirna in hawn leh tur thuchhuah a siam angin Mizoram Presbyterian Church Sikulpui pawh a inbuatsaih chho ve a. Nimahsela, Sikulsen (Primary section) lam hi Covid Vaccine pekna leh Kiosk (covid sample lakna) atana hman a nih avangin an insawn chhuahna tur te ngaihtuah hmasak a ni.
School kal tan ni hmasa berah hian Pathian hnena lawmthu sawina leh inhlanna hun te hman a nih hnuah anmahni Pawl theuhah Zirtirtute nen inhmelhriattirna neiin hriat tur tulte inhrilh a ni a. Chumi zawhah thlalak hona (photo session) neih a ni.
Naupang 211, Zirtirtu 15 (Headmaster nen), Non Teaching staff 3 an awm a. School tan ni hian thawktute an kal kim vek a, harsatna eng eng emaw avanga lo kal thei rih lo naupang 6 an awm. Sikulpui hi Mizoram Sawrkar chuan May 22, 2020 khan a takin Mizoram Synod hnenah a hlan a. Inhlan letna lehkhaah hian School Education Department aiawhin Pi Esther Lalruatkimi, Commissioner & Secretary-in hming a ziak a. Mizoram Synod aiawhin Moderator Rev. R. Lalchangliana’n hming a ziak bawk. October 16, 2020-ah Synod Moderator Rev. R. Lalchangliana’n Pathian hnenah hlanin a hawng zui a ni. Kum 2020 -2021 session atangin online class kalpui tan a ni a. A bul tan atangin Pathian hruaina leh malsawmna an dawng nasa hle a, naupang thahnem tak an nei nghal a. Kuminah phei chuan lak sen loh diltu an hmu hial a ni.
Sikulpui thawktute chuan, Missionary rilru puin Sikul tha tak din chhoh leh a, SIKULPUI a nih thin ang takin, Pathian ropui nana Sikulpui tih-PUI leh tumin theihtawp an chhuah zel a ni.
For more Pics Click Here