April 15, 2022 (Zirtawpni) hi Good Friday a ni a, April 17, 2022 hi Easter Sunday a ni bawk a. April 14, 2022 (Maundy Thursday) atangin Good Friday Programme hi hman tan a ni ang.
Maundy Thursday hian Kohhran hrang hrangah Lalpa Zanriah Sakramen kilho a ni ang a. Presbyterian Kohhran chuan Good Friday leh Easter Sunday thupui in ang tlang an zirho dawn a, Easter Sunday chawhma, chawhnu leh zanah hetiang hian thupui an zir ang.
Good Friday:
Chawhma : Sual man chu thihna
Chawhnu : A Thlarau a thlah ta
Zan : Krista thisen- sual ngaihdamna
Easter Sunday:
Chawhma : Thawhlehna ropui
Chawhnu : Tho leh Lalpa hmutute chu
Zan : Amah ngei hi a lo kal leh ang
Good Friday leh Easter Sunday hi Krismas te anga a Ni ngai hman a ni lo va, a chhan chu Lal Isua thih hun lai hi Judate Kalhlen Kut hman lai vel Nisan ni 14 vel a ni a, chu chu March thla chawhnu lam, March 20 hnu, April ni 25 hma lam si, thla fang bial lai a ni a. Chuvangin tun thleng hian Good Friday hun hi March ni 20 leh April ni 25 inkara thla fang bial lai, Zirtawpni hi a ni ta zel a. Good Friday hma Pathianni hi Tumkau Ni-ah hman a ni a, Good Friday zawh Pathianni hmasa ber chu Isua Thawhlehni, Easter Sunday a ni ta zel a, Easter Sunday atanga chhuta ni 50-na chu Pentikos ni a lo ni ve leh bawk a ni. Thla fang bial lai chhuta a hun leh ni ruat thin a nih avangin heng ni pawimawh te hi a hun leh ni a danglam deuh hret hret thin a ni.
April 18, 2022 (Thawhtanni) hi Easter Monday anih avangin Synod hnuaia department hrang hrang te an chawl ang.