Nimin (April 18, 2022) khan tun hnaia Pangbalkawn leh Bairabi vela thlipui leh rialin chenna in a tihchhiat tuartute Mizoram Synod chuan chhawmdawlna hlan.
Mizoram Synod aiawh hian Synod Puipate - Rev. Dr. K. Lallawmzuala, Executive Secretary; Rev. Lalsangbera, Statistician leh Upa B. Lalhmunliana, Synod Secretary (Jr.) te a hmunah an kal a, Pangbalkawn Bialah chhungkaw 140 leh Bairabi Bialah chhungkaw 41, an vaiin chhungkaw 181 chhawmdawlna atan hian Rs. 14,68,000/- chu Bial vawngtu Pastor-te leh an Bial hruaitute kutah an hlan a ni.
Thlipui leh rial avang hian chenna in chhe vek leh thawmthat ngai chhungkaw 181 lai an awm a, Pangbalkawn leh Pangbalkawn Hmar Veng huam chhunga chhungkaw 75 tan Rs. 5,48,000/- chhawmdawlna hlan an ni a, Meidum, Meidum Vengthar, South Chhimluang leh Bethlehem Branch Church huam chhunga chhungkaw 65 te tan Rs. 4,48,000/- chhawmdawlna hlan an ni. Bairabi Hmar Veng huam chhunga chhungkaw 16 tan Rs. 1,38,000/- leh Bairabi Chhim Veng huam chhunga chhungkaw 25 tan Rs. 3,34,000/- chhawmdawlna hlan an ni bawk.