Mizorama Pathian thu zirna inpui leh hlun bera ngaih Aizawl Theological College chuan April 20, 2022 khan kum 2021-2022 Academic Session chhunga BD, M.Th. leh D.Th zir zo tur, mi 57 te thlahna hun an hmang.
Valedictory Service hi ATC Chapel-ah neih niin Rev. Prof. Tlanghmingthanga, Principal-in a kaihhruai a. Rev. Dr. Vanlalnghaka Ralte, Synod Moderator chuan hmanpuiin, zirlai chhuak turte thlahna thuchah pawimawh tak sawiin Pathianin a koh ang taka nung tur leh, Pathian ram zau nana thawka, an awmna hmun theuhvah kohhran mi tangkai ni turin a fuih a ni.
He hun hmanpuitu Rev. Dr. C. Vanlalhruaia chuan kum 2021-2022 chhunga zirlai titha lawmman chi hrang hrang paruk a sem a. Zirlai kal chhuak turte hnenah, Rev. Dr. Vanlalnghaka Ralte, Synod Moderator & Rev. K. Lungmuana, TEB member te chuan Certificate an hlan bawk. Hun tawp chu Rev. Lalrinawman malsawmnain a khar a ni.
He inkhawm urhsun tak hi kum dang angin pawn lam atanga lawmpuitu sawm lovin, ATC-a awmsa leh Synod Theological Education Board member ten an hmang ho a ni.
ATC hian hri leng vanga hun khirh tak karah online class-a zirna an kalpui hnuin tunah chuan a pangngaiin zirna an kalpui leh tan mek a, May 2-21, 2022 chhung hian exam an nei ang.
