Synod Prison Ministry chuan Aizawl khawpui pawna Mizoram District Jail pasarih (7) : Champhai, Kolasib, Mamit, Lawngtlai, Lunglei, Serchhip leh Siaha District Jail te a hmunah tlawha, an din hmunte zirchianga tlawh runpui, thawh khatna an kalpui mek chu April 27, 2022 khan zawh a ni.
District Jail tina Superintendent leh thawktu dangten, lâwm tak leh phur takin an lo dâwnsawn avangin Synod Prison Mininstry chuan lawmthu an sawi. Rev Lalhmuchhuaka, Director, Synod Prison Ministry chuan, "Tun aia chak leh awmze nei leh zuala thawk turin, Synod Prison Mininstry chuan Kohhran leh khawtlang, tlawmngai pawl leh Kohhran huang chhhunga Committee peng tin te, Kohhran mipui mimirin kan tih theih tam tak, a nachang kan hriat loh avanga kan tih lohte inhrilh hriat thar zel a. Tun aia Sawrkar kut ti chak lehzual tûrin ruahmanna te siamin, kan phur hle a ni," tiin a sawi a. "Jail hi mi sualte nghaisakna leh hremna hmun ni lovin, Pathianin mihring min siam chhan ang takin; kan unau tuna tang mêkte hi eng vang pawhin tang se la. Taksa, rilru leh thlarau lam nunah siamthatna famkim an chan theihna turin an tan chhûng hian; an lo chhuah hunah leirem an raha, an chhungte tan leh an lawina kohhranah te, khawtlang leh ram tâna mi tangkai, mi dangte tâna innghah ngamna an nih theihna turin, Correctional Centre a nih ang taka Jail hi enkawla, buatsaih a nih theihna turin, vocational training mumal leh changtlung taka kalpui a nih theih nan, Synod Prison Mininstry chuan Sawrkar kut tichaka, thawhpuitu nih hi a tum ber pakhat a nih thu a sawi bawk. Jail tang mêkte pawhin, Synod Prison Mininstry hi lâwm taka min thawhpui avangin kan lâwm tak zet a ni," tiin a sawi bawk.
I.G Prisons atanga phalna an hmuh angin, Central Jail, Tanhril leh District Jail, Armed Vengah chawlhkar tin ni hnih (2) ve ve, mimal thlarau lam nun luhchhuah zawnga rawngbawlna (Counselling) neiin, thla tin Pathianni vawikhatna leh vawihnihna-ah Pathian Biak inkhawm an neihpui a. Aizawl khawpui pawn lama District Jail-ah erawh chuan, thla tin Pathianni vawikhatna leh vawi thumna-ah Synod Prison Ministry, District Hruaitute ruahmannain inkhawm thin a ni bawk. Jail-a Pathian Biakna hmanrua tihchangtlun kawngah Synod Prison Ministry hian a thawh hlawk hle.
For more pics Click Here