Nimin (May 3, 2022) khan Presbyterian Kohhran Mizo Sunday School Union buatsaih ‘17th Biennial Secretarial Training’ chu J.M. Lloyd Hall, Synod Office-ah neih a ni.
17th Biennial Seretarial Training hi nikum 2021 kha a neih hun tur tak chu a ni a. Nei tura ruahhmanna tih fel nimahse hripui avangin neih theih a ni ta lo a. Hrileng a ziaawm takah chuan a hun pangngai angin nei thei lo mah ila, nikhat chauh tal Secretary mawhphurhna pawimawhzual in hrilh ni se, tiin rel a ni a, nimin khan tluang taka neih a ni ta a ni.
Training-ah hian Rev. V.L. Luaia Hranleh, Executive Secretary i/c MSSU-in hunserh a hmang a, Pi Lalpianthangi Hrahsel, MSSU Coordinator-in Inlawmna leh Inhmelhriattirna hun a hmang.
First Session-ah ‘Secretary hna leh mawhphurhna’ tih thupui hmangin Pu H.K. Hmingthanzuala, MSSU Asst. Coordinator-in thu a sawi a, Pu John Lalhruaitluanga, Archives Asst. Coordinator-in Practical a neihpui bawk. Second Session-ah ‘Sunday School inrelbawl dan leh Inkaihhruaina’ tih thupui hmangin Pu Lalhmunzauva Tlau, MSSU Asst. Coordinator-in thu a sawi leh a, Pu John Lalhruaitluanga, Archives Asst. Coordinator-in Assignment khaikhawmna a neihpui leh bawk. Hemi hnu hian zawhna leh chhanna hun tha tak hman a ni.
Reflection and Farewell neih chhunzawm nghal a ni a, Rev. Z.D. Lalhmachhuana, Synod Secretary-in programme a kaihruai a, trainee aiawh thusawi ngaihthlak a nih hnuah Rev. Z.D. Lalhmachhuana’n thusawiin trainee-te Certificate a sem a, Pi Lalpianthangi Hrahsel, MSSU Coordinator-in lawmthu sawina neiin training khar a ni.
Training-ah hian Synod hnuaia MSSU zawmtu Pastor Bial tin Bial Sunday School ziaktu pakhat theuh tel tura tih an ni a, mi 153 an tel thei a ni.
For more Pics Click Here