Rev. Sairengpuia Sailo (kum 55) chu nimin (May 8, 2022) chawhma dar 10:00 khan Kal Cancer avangin a thi a, vawiin (May 9, 2022) 12:30 p.m. hian Kolasib Venglai Kohhran Biak Inah Rev. Dr. Vanlalnghaka Ralte, Moderator, Mizoram Synod-in a vui.

Rev. Sairengpuia Sailo hi November 30, 1967 khan Pu Lalngura Sailo (L) leh Pi Biaktluangi (L) te fa 10 zinga 7-na ni turin Chhawrtui khuaah a piang a. An unau indawt dan chu hetiang hi a ni -
1. Lalsangzuali Sailo (L) w/o Lalbiakthanga, Bethlehem Vengthlang
2. Dr. Lalhlimpuia Sailo h/o Rochhingpuii, Kolasib Venglai
3. Lalnunsanga Sailo (L) h/o Lalngurkhumi (L), Kolasib Venglai
4. Vanlalmuani Sailo (L), Kolasib Venglai
5. Rosiamliana Sailo h/o Lalzuiliani, Kolasib Venglai E
6. Laldingsanga Sailo h/o Zomuanpuii, Kolasib Venglai
7. Rev. Sairengpuia Sailo h/o Laldingliani, Kolasib Venglai
8. Saipari Sailo, Kolasib Venglai
9. Lalrochunga Sailo (L) h/o Malsawmtluangi, Durtlang
10. Rosangpuii Sailo w/o Upa C. Vanlalzawma, Kolasib Venglai

Kum 1992 December 2 khan Laldingliani d/o Upa Saithankhuma, Durtlang Leitan nen inneiin fa 3 an nei. An fate chu -
1. Lalramdini Sailo - Ph.D. zir mek 
2. Lalhruaitluangi Sailo - M.Sc. (Agri.) zir mek 
3. Lallawmzuala  Sailo - B.A. zir mek

Zirna lam : St. John High School, Kolasib-ah zirna bul tanin  HSLC thleng a zir a. Bethany  khuaa Synod hnuaia Missionary-a a tan  lai 1994 khan Private-in P.U. a pass a, chumi hnu 1995-ah ATC-ah B.Th. zir tanin 1999 khan a zir chhuak a ni.

A mizia :  A tet lai atangin naupang harhvang leh hlim thei tak a ni a, fiamthu duh mi a ni. Midangte khawngaihna ngah, thian siam thiam, thil reng reng a eng zawnga thlir thin mi a ni. Pa tawng duh, rualpawl leh thenrual  kawm  nuam  ti  mi,  Kohhran  leh  Krista  rawngbawlna  dah chungnunga inpumpek mi a ni.

Krista Chanchin Tha tuipui mi a ni a, Bible chhiar leh fianrial tawngtai te hi a uar hle. Pathian thusawi tui mi a ni a, Krista khawngaihna Chanchin Tha tlangaupui hi a kham thei thin lo a ni ber mai. 

Rawngbawlna lam : Pastor-a a luh hmain Missionary-in a lo chhuak tawh a, February 1990 - December 1993 thleng khan Evangelist Teacher-in Chikha (Tuipuibari Bial)-ah a thawk a, January 1994 - October 1995 thleng Bethani (Hortoki Bial)-ah a thawk leh a. Kum 1999 Synod Inkhawmpui
chuan Probationary Pastor atan a la a. Rawngbawla a awm tawhna te chu -
1. 2000 - 2002 : Pro.  Pastor,  Vanzau
2. 2003 - 2005 : Pastor, Tuidu Tripura
3. Jan 2006 - April 2008 : B.D. zirin UTC Bangalore
4. 2008 - 2010 : Pastor, Kathikund (Jharkhan) Mission Field
5. Jan 2011 - 2012 : May Lecturer MTC, Mission Vengthlang
6. June 2012 - Dec 2017 : Pastor, Cambodia
(Cambodia-a a han awm hian Synod Mission hma lakna hrang hrangah hma kan sawn hle a, a ram mite nen thawk hovin a awm chhung hian sawrkar hriatpuina leh remtihnain Synod-in Society Registration nghet kan nei hman a. He Registration hmang hian Missionary lut zel tur sponsorship chungchangah leh Synod hma lakna hrang hrangah kan awlsam phah a ni.)
7. 2018 - 2019 : Pastor, Biate
8. 2020 - 2021 : Field Secretary, Tripura
9. 2022 - till date : Counsellor, FG&CC Mission Veng, Aizawl.

A natna lam : Tripura Mision Field Secretary-a a awm lai March 2021 thla tir lam khan a khuh a  reh thei lova, Tripura Medical College-ah a inentir a, Cancer a ni tih hmuhchhuah a ni a. CMC&H Vellore lamah refer niin March 2021 khan a inentir ta a, a chuap, a kal (Kidney) leh a thluak-ah te Cancer a lo taidarh vek tawh tih hriat ni. Zai ngam a ni tawh lova, dam mai thei lo dinhmuna dingin damdawi nen enkawlzui a ni ta a ni.
March 2022-a check up-a a kal leh khan a kal (Kidney) pakhat paih sak a ni a. A damdawi ei lai mekin a taksa-ah harsatna hrang hrang a siam avangin a rawn haw chho hi Doctor-te’n a damdawi an thlak sak a. A natna avanga damdawi In a awm chhung tih loh chu rawngbawlna hi damlo chung pawhin a chawlhsan lo. April 20, 2022 khan a pum a nawm loh avangin Synod Hospital, Durtlang-ah admit a ni a, a rilphir an lo zai sak a. A dam that theih loh avangin April 25, 2022 khan Ebenezer Hospital-ah refer a nih angin admit a ni a; nachhawkna leh dialysis hmanga enkawl a ni a. May 8, 2022 (Pathianni) chawhma dar 10:00 khan Kidney Cancer avangin Lalpa hnenah a chawl ta a ni.

VUINA PROGRAMME
A hmun : Kolasib Venglai Kohhran Biak In
A hun : Ni 9 May, 2022 (Thawhtanni) Chhun dar 12:30

Vuitu : Rev. Dr. Vanlalnghaka Ralte, Moderator, Mizoram Synod
Chanchin sawi : Rev. Z.D. Lalhmachhuana, Secretary (Sr.),  Mizoram Synod
Tawngtai sakna : Rev. Lalsangbera, Statistician, Mizoram Synod
Zaipawl :  Kolasib Venglai Pastor Bial
Hla : KHB No. 489 “Van hmun ropui’
Malsawmna : Rev. VL Luaia Hranleh, Executive Secretary, Mizoram Synod
Thlanmual : Pro. Pastor Lalchhuanawma Ralte, Kolasib Venglai