Vawiin (May 11, 2022) chawhma dar 10:00 khan Synod Pastoral Committee, J.M. Lloyd Hall, Synod Office-ah neih a ni a, hei hi kum 2022 - 2024 term thutkhawm vawi 1-na a ni. Aizawl chhung atangin 36 leh Aizawl pawn atangin 84, an vaiin member 120 an kal.
Meeting hi Rev. Dr. Vanlalnghaka Ralte, Synod Moderator-in a kaihruai a, Rev. Z.D. Lalhmachhuana, Synod Secretary (Sr.) hnen atangin Secretary Report ngaihthlak a ni.
Report-ah hian kum 2021 Synod-in a rel angin Tualcheng Pastor Bial thar Mizoram chhungah hawn thu leh Ramthar lamah Pastor 2 hawn a nih thu te, Pro. Pastor 17 lak thar thu te, Minister pension-a chhuak 15 an awm thu te, Kum 2020 leh 2021 Synod inkarah Minister thi 10 lai an awm thu te, Awmna ngaia kum 5 awm tawh awm zui tur 14 an awm thu te, Field Secretary/Administrative Secretary-a ruat thar 12 an awm thu te, Minister Bial vawng leh vawng lo term hmang zo 50 sawn an nih thu te, 2022 May-a zir zo tur 8 an awm thu te, Minister leh Pastor 15 awmna siam rem thu te, Pastor nemngheh thar 17 an awm thu te leh Pro. Pastor 5 awmna siam rem thu te ngaihthlak a ni.
Synod 2021 hnuah Pastor 2 - Rev. Hasei Vaiphei, Manipur Area, Leilon Bialtu Pastor leh Rev. Sairengpuia Sailo, Counsellor, FG&CC ten chatuan ram an pan thu te, 2021 Synod inkhawmpuiin a rel angin Bial 3 - Tualcheng, Kulpi, Calcutta leh Rayagadha, Odhisa-ah hawn a nih thu te, Pastor leh Pro. Pastor awmna sawnte Induction neih a nih thu te tarlan a ni bawk.
Meeting-ah hian Pastor zirna sang zawk zir leh dilte atangin D.Th.-ah 4, M.Th.-ah 6, D.Min.-ah 3, B.D. (Hindi)-ah 2 leh Diploma in Clinical Pastoral Counselling (DCPC)-ah 1 te zir chhunzawm phalsak an ni.