Vawiin (May 12, 2022) chawhma dar 10 khan Synod Social Front Committee vawi 194-na chu J.M Lloyd Hall, Synod Office-ah an thu a, Aizawl chhung atangin 15 leh Aizawl pawn atangin 20, an vaiin member 35 an kal.
Meeting hi Rev. Dr. Vanlalnghaka Ralte, Synod Moderator-in a kaihruai a, Secretary hnen atangin Secretary Report ngaihthlak a ni.
Report-ah hian Synod Rescue Home, Durtlang leh Champhai ami te hripui avanga hun engemaw chen damlo admit theih anih loh hnuah tunah chuan kaldan pangngaiin kal leh theih anih tawh thu te, Synod Charity Store leh Upate In pawh kal dan pangngaia kal a nih leh theih tawh thu te, “Mizote tan nun kawng dik” lehkhabu thar release anih thu te, Synod Social Front inkaihhruaina bu thar siam anih thu te, Bial hrang hrangah Synod Social Front campaign neih anih thu te tarlan a ni.
Tun tumah hian thu ngaihtuah tur 12 chhawpchhuah a ni a, Social Media a tha zawnga hman dan inzirtir rawtna chungchang te, Ram ngaw, nungcha leh tui hna nasa zawka humhalh chungchang te, Political Education chungchang te, Synod Rescue Home Durtlang, handbook chungchang te, Synod Social Front campaign uar zawka kalpui chungchang te, Kutthemthiamna training buatsaih chungchang te chu a langsar zualte an ni.