Vawiin (May 13, 2022) chawhma dar 10:00 khan Synod Office-a J.M. Lloyd Hall-ah Presbyterian Communications Board meeting vawi 175-na a thu a, member 45 an kal.
Meeting hi Rev. Dr. Vanlalnghaka Ralte, Synod Moderator-in a kaihruai a ni. Secretary report ngaihthlak a ni a, Provisional Synod-a awm tura Manipur Area buatsaih a nih avangin Synod Bookroom, Churachanpur Branch kal zel dan tur ngaihtuahin PRESCOM hotute Churachanpur Branch Committee-ah an zuk tel thu te, Synod Bookroom Branch thar hawn dil - Keifang, Khawzawl Vengthar, Saitual Bial leh Saitual Chhim Veng Bial te tlawhin inkawm hona neih thu te, PRESCOM hnuaia hnuaia thawktu 12 an kai san thu te, Synod Bookroom, Bazar Branch building hnuai siam leh chei that mek a nih thu te, Digital khawl thar 2 - DP-X550 leh DP-G225 lei thar thu te, Bookroom Chah Dawr (home delivery) kalpui tura Sub-Customer Information File-a Account hawn rem tih thu te, Hnahthial khuaa Synod Bookroom dinna tur in lei fel a nih thu te, Synod Bookroom, Headquarters sak mek chu November, 2022-a hna zawh fel theih an beisei thu te ngaihthlak a ni.
Tun dinhmunah Synod Bookroom Branch 15 awm mekin, Aizawl chhungah Branch 7 a awm a, Mizoram pawnah branch pakhat (Churachandpur Branch) a awm thu te, Mizoram chhunga veng/khaw hrang hrang 41 leh Mizoram pawn, Shillong-ah Distributor an awm tawh thu te, a vaiin Bookroom dawr 57 a awm mek thu leh Bookroom bungraw zuar nghet ve deuh (Sale or Return) 7 an awm mek thu te ngaihthlak a ni bawk.
Meeting-ah hian Synod Bookroom Headquarters leh Branch tin puala Internet Banking Facility hman theihna Account hawn thar tur zir chianna leh rawtna te, District Capital , Synod Bookroom la awm lohna - Khawzawl leh Saitual/Keifanga Branch hawn chungchang te leh Zawlnuam khuaa Synod Bookroom Branch hawn leh chungchang te chu thu ngaihtuah tur langsar zualte an ni.