Nimin (May 17, 2022) khan Missionary Training College (MTC) chuan Graduation Day Vawi 10-na, Golden Jubilee Hall, Mission Vengthlang Kohhranah an hmang a, B. Miss. zir zo mi 20 te thlah an ni.
Programme hi chawhnu dar 2:00-ah tanin Rev. Dr. C. Lalramchhana, Principal MTC in a kaihruai a, Rev. Vanlalsawma, MTC Asst. Professor-in Pathian awmpuina dila tawngtaina hun a hmang. Pi Vanlalthiani, MTC Asst. Professor-in lawmthu sawi tawngtaina a kaihruai a, Rev. Vanlalawmpuia, MTC Registrar-in Graduate tharte hmelhriattirna a nei a, Synod Moderator Rev. Dr. Vanlalnghaka Ralte in Graduation Day thuchah a sawi a, College Magazine thar a tlangzarh bawk. Rev. Z.D. Lalhmachhuana, Synod Secretary-in zirchhuakte hnenah Certificate a hlan a, Synod Mission Board Secretary Rev. R. Lalhmingsanga'n Graduate tharte Pathian hnena hlanna hun a hman hnuin Rev. Dr. Tlanghmingthanga, MTC Governing Board member-in tawngtaisakna hun a hmang. Faculty aiawhin Pi Vanlalthawmi, MTC Asst. Professor-in thlahna thuchah tawi a sawi a, zirlai kal chhuakte aiawhin Lalfakmawia leh MTC Students’ Body Secretary C. Vanlalmuanpuia hnen atangin thusawi ngaihthlak a ni a, Synod Mission Choir vawi 2 an zai bawk. Rev. Dr. K. Lallawmzuala, Executive Secretary i/c Mission-in zirlai titha te hnenah lawmman a hlan a, Rev. Malsawmdawngliana, MTC Asst. Professor-in lawmthu sawina hun hmangin Rev. Z.D. Lalhmachhuana'n malsawmnain programme a khar a ni.
Tun tumah hian zirlai titha lawmman (College Awards 2022) hetiang hian hlan an ni :
1) R. Dala Award for Biblical Studies - Malsawmdawngzela
2) Rohmingthangi Award for Theological Studies - Malsawmdawngzela
3) Tirhkoh Chhingtei Award for Mission & Historical Studies - Malsawmdawngzela
4) M. Suaka Award for Religious and Cultural Studies - Malsawmdawngzela
5) Tirhkoh Thangzawna Award for Christian Ministry - Malsawmdawngzela
6) Rev. Dr. Lalsawma Award for Language Studies- Malsawmdawngzela
7) Lalbiakchhungi Award for Academic Excellence - Malsawmdawngzela
8) Robuanga Award for Best Outgoing Student - Vanlalchhuansanga
Missionary Training College hi kum 1978 khan Missionary Training Department tiin Aizawl Theological College-ah bul tan a ni a. Kum 1996 atang khan Aizawl Theological College (ATC), Durtlanga sawn chhoh a nih hnuin Synod Multipurpose Training Centre (SMTC) nen a kal kawp leh a, chumi hnuah chuan Synod Multipurpose Training Centre (SMTC) atangin lak hran niin Missionary Training Centre tih a lo ni ta a. Kum 2007 Synod chuan College-a hlan kai a remti a, Synod thurel angin June 4, 2010 khan Missionary Training College (MTC) chu a lo piang ta a, Senate of Serampore College hnuaiah chuan B.Miss zirna hmasa ber a ni. MTC-ah hian B. Miss zirna bakah missionary training chi hrang hrang neihpui thin a ni bawk.