Northeast India Christian Council (NEICC) Biennial Assembly vawi 79-na chu Covid-19 hripui lêng avàngin a hun (2021)-ah neih theih a ni lo va. Hrilêng a lo ziaawm tâk deuh avàngin kuminah mi tlêm deuhte telna ‘Rorêl inkhâwm’ neih tûra ruahman a ni ta a. Executive Committee member te, Standing Committee member te leh member nih dîl thar aiawhte telna rorêl inkhâwm chu May 20, 2022 khân Union Christian College (UCC), Barapani, Meghalaya-ah neih a ni.
Assembly tih ni lovin Rorêlna (Sessions) tih a ni ta thung a. Rorel Inkhawm tan hma May 18, 2022 khân thil tûl hmasa Executive Committee leh Nomination Committee member-ten an lo rêl a. He Rorêl inkhâwm tûra kal hunlai vêl hian ruahsûr a nasain lei min leh tuilian a thlen avàngin member tam tak an kal theih tâk loh avàngin mi 70 bâwr vêl chauh an kal thei a ni.
Mizoram Synod atangin Rev. B. Sangthanga (Church Union Committee member), Rev. Dr. C. Lalhlira (Theological Committee Convener) leh Pi Lalliantluangi (Christian Home & Stewardship Committee member) leh Dr. T. Vànlaltlani, Executive Committee member te an kal.
Union Christian College (UCC)-ah Rorel a ni a, Rorêl zawh fel vekah a khàrna inkhâwm UCC Chapel-ah neih a ni a. President kal chhuak Rev. Kethozelhou Keiho chuan thuchah a sawi.
Hruaitu thar thlan a ni a, chûng mite chu:
President : Rev. R. Lalnunzira Baptist Church of Mizoram
Vice Presidents : Rev. S.R. Dhar, KJP Synod Minghi & Bishop IchahakMusahari, BELC
General Secretary : Rev. Dr. Ramêngliana, Manipur Synod
Treasurer : Rev. R.T. Shangdiar, KJP Synod Sepngi
Executive Committee member atân Mizoram Synod atangin Pi Lalliantluangi (Aizawl Lily Vêng) ruat zîngah a tel a. Dr. Lalnghâkthuami (ATC) pawh Theological Committee member atâna ruat zîngah a tel bawk. Committee pêng hrang hrang ruatsa bâkah member kohhran leh Para-church te atanga la inruat belh tur a ni ang.
Kum hnih dan Inkhâwmpui (Biennial Assembly) vawi 80-na chu Nagaland-ah kum 2024 khian neih tum a ni a. Nagaland Baptist Kohhranin an thleng ang.
North East India Christian Council (NEICC) hi kum 1937 a din a ni a, India Hmarchhaka (Roman Catholic tih loh) Kohhran hrang hrang leh Kristian Pâwl hrang hrang inthlun khawmna a ni a, tûnah hian kohhran hrang hrang (Church member) 35 leh (Associate member) Kristian pawl hrang hrang (Para Church kan tih mai) 17 an tel a, tun inkhawmpuia tel thar pâwl 3 nen 55 an tling tawh a ni.