Synod Mission Board chuan May 25-31, 2022 chhung hian Mission Field hrang hranga Field Secretary leh Field Pastor-te pualin Mission Orientation Programme, Missionary Training College (MTC)-ah a buatsaih mek a, Field Secretary 10 leh Missionary Pastor 39, an vaiin mi 49 an tel a ni.
Nizan (May 25, 2022) khan Inlawmna leh inhmelhriattirna inkhawm tawi neih a ni a, Rev. R. Lalhmingsanga, Synod Mission Board Secretary-in hun a hmangpui a ni. Vawiin (May 26, 2022) atangin thupui hrang hrang – Cultural Anthropology & Mission, Field Administration, Mission Challenges & Issues, Internet hmanga rawngbawl dan, Administrative Skill, Financial Management & Accounts Training, Evangelism & Church Planting, Missionary Life & Practical Challenges, Interpersonal Relationship, Servanthood Ministry, Personal Management, Legal Awareness, Language Learning leh Documentation tih te zir a ni ang a, May 28, 2022 (Inrinni) zan atanga May 29, 2022 (Pathianni) zan thlengin kohhran hrang hrang tlawhin an kal ang.
May 31, 2022 (Thawhlehni) chawhma lamah Synod Mission Board hotute nen inkawmhona hun an hmang ang a, chawhnu dar 2:00-ah Orientation programme kharna inkhawm neih a ni ang. Kharna inkhawm hi Rev. Dr. C. Lalramchhana, Principal, Missionary Training College-in a kaihruai ang a, Rev. Dr. K. Lallawmzuala, Executive Secretary i/c Mission-in thuchah a sawi ang.
