Vawiin (May 27, 2022) khan Synod Lay Workers Fellowship Annual General Meeting vawi 46–na (Lay Day) chu Aizawl Theological College, Durtlangah neih a ni.
Lay Day programme hi hun hniha hman a ni a, hun khatna hi Upa Vanlalawma, Vice Chairman, SLWF in a kaihruai a, Pu S.R. Lalnunsanga, PRESCOM-in tanna hun a hmang. Report pahnih – Secretary leh Treasurer hnen atangin ngaihthlak a ni a, Synod Moderator Rev. Dr. Vanlalnghaka Ralte hnen atangin Lay Day Address ngaihthlak a ni. SLWF member pension-a chhuak mi 14 te hnenah ngaihhruina thilpek hlan an ni a, chatuan ram pan mi 4 sunna hun hman a ni bawk. Upa Lalrinmuana, Coordinator, Synod Hospital-in kum 2022-2024 chhunga hruaitu tharte Pathian hnena hlanna hun a hmang.
Hun hnihna hi Upa Lalthahluna Ralte, Finance Secretary, SLWF-in a kaihruai a, Special Items hrang hrang hmangin hun hlimawm tak an hmang a, tlaiah ruai an theh nghal a ni.
Kum danga an lo tih thin angin Lay Day pual hian Synod Hospital Director hnenah Hospital Charity Fund Rs. 1,77, 820/- hlan a ni.
Synod Lay Workers Fellowship Annual General Meeting (Lay Day) hi kum tina hman thin a ni a, kum 2020 & 2021 khan Covid-19 hripui leng avangin an hmang thei lo a ni.
Synod Lay Wowkers Fellowship (SLWF) hi Synod hnuaia thawktu, Pastor ni lo intelkhawmna a ni a, tun dinhmunah member 823 an awm mek a ni.