May 26, 2022 khan Mizoram Presbyterian Kohhran Hmeichhe Rorel Inkhawm vawi 11-na chu Mission Veng Kohhran Biak Inah neih a ni. Rorel Inkhawm thupuiah ‘Sim ula, hawi kir leh rawh u’ (Tirhkohte 3:19) tih hman a ni.
Covid-19 hripui leng avangin kum dang angin Rorel Inkhawm hi neih theih a ni lova, Synod Executive Committee (SEC-) thurel angin kuminah hian nilenga hun hman a ni.
Rorel Inkhawm hi Inkhawmpui Lian Chairman Pu Sailuti’n a kaihruai a, kum 2023 Budget leh Project ruahmanna te, kum 2022-2023 Inkhawmpui Lian sum hmuhna leh hmanna tur ruahmanna te, kum 2023 Inkhawmpui Lian leh kum 2024 Rorel Inkhawm chungchang te an ngaihtuah a ni. Rorel Inkhawmah hian palai 332 (Bial aiawh - 211, Central Committee - 44, Synod Puipate - 3, Central KTP Palai = 2, Superintendent Hmangaihna In - 1, Superintendent Women Centre - 1, Hmeichhe Pathian thu zir chhuak Synod-a thawkte - 11, Pastor/Pro. Pastor - 1, Minister - Nil, Upa - 6 & Chhimtu = 52) an kal a ni.
Chawhnu lamah report hrang hrang General Secretary, Asst. Secretary leh Treasurer report te ngaihthlak a ni. Kristian Chhungkaw Dinhmun tehna result (January - December 2021) puan a ni a, lawmman pakhatna hi a dawngtu pahnih awmin N.E. Khawdungsei Bial leh Phainuam Bial te an ni a, Synod Moderator Rev. Vanlalnghaka Ralte in No Mawi a hlan a ni.
Tun tumah hian Bial hrang hrang atanga lut agenda general 14 chhawpchhuah a ni a, 2022 – 2023 budget pawh pawm a ni.
Bial Chanchin Report Khaikhawmna (January – December 2021) :-
Kum 2021 chhunga Mizoram Presbyterian Kohhran Hmeichhe Inchhiarnaah Pastor Bial leh Kohhran mal anga zawmtu 215 an awm a, report a lut kim vek thei a ni. Kum 2021 Report tlangpui hetiang a ni :
1. Report lut zat Bial : 210
2. Kohhran mal anga min zawmtu : 5 (Kolkata, Delhi, Bengaluru, Mumbai & Pune)
Total : 215
3. Kohhran zat : 901
4. Branch Church zat : 73
Total : 974
5. Presbyterian hlang chhungkaw zat : 1,11,180
6. Inawm pawlh chhungkaw zat : 4,392
7. Chhungkua zawng zawng zat : 1,15,572
8. Nitin chhung inkhawm nei zat : 75,876 = 65.65%
9. Buhfaitham tham ziah zat : 1,13,644 = 98.33%
10. Hmeichhe member zat : 1,88,060
11. Kum 2020 aia member punna : 4,138
12. Member tam berna Bial : Champhai Vengthlang
13. Member zat : 2,869
14. Member tlem berna Bial : Buarpui
15. Member zat : 40
16. Hmeichhe inkhawm nei thei vek Bial 178 an awm a, Bial 37 atanga inkhawm thei lo Kohhran/Branch Church 73 an awm.
17. Kum 2021 chhunga buhfaithama hmuh zat belh khawm chu Kg. 1,12,51,818.100grams a ni.
Thurel tlangpuite :
1) Kum 2023 Kohhran Hmeichhe Inkhawmpui Lian chu March 10 – 12, 2023 chhungin Darlawn Kohhranah nghah a ni ang a, kum 2024 Kohhran Hmeichhe Rorel Inkhawm chu Dawrpui Kohhran Biak Inah nghah a ni ang. Kum 2025 Kohhran Hmeichhe Inkhawmpui Lian chu Thenzawlah nghah a ni ang a, kum 2026 Kohhran Hmeichhe Rorel Inkhawm chu Champhai Vengthlang Kohhran Biak Inah nghah a ni ang a, kum 2027 Kohhran Hmeichhe Inkhawmpui Lian chu North Vanlaiphaiah nghah a ni thung ang.
2) Kum 2022-23 Inkhawmpui Lian Budget atan hetiang hian pawm a ni. Central Budget : Rs. 15,00,000/-, Women Centre : Rs. 27,00,000/- Total : Rs. 42,00,000/-.
3) Kum 2022 thla thar tawngtairual thupuiah ‘Kum 2023-a inthlanpui (MLA Election) lo awm tur atan tih telh ni rawh se, tih chu Tawngtaipual thupuia telh lovin mahni bial chhung kohhran theuhah hmalak ni rawh se tih a ni.
4) Kohhran Hmeichhe Committee-a awm turin kum 70 chin ni rawh se, tih chu Inkaihhruaina buah kum bithliah a awm loh avangin ‘Kohhran Hmeichhe Committee-a awm turin a theih chinah kum 70 aia upa lo ni rawh se’ tiin her rem a ni a, Synod Executive Committee-ah thlen tura tih a ni.
5) Synod Hospital, Durtlang leh John Williams Hospital, Lunglei Charity Fund atan rampum huapin inkhawm tum khat thawhlawm pek ni rawh se, tih chu pawm a ni a, Central Committee lo bawhzui tura dah a ni.
6) Ram pum huapa awm ni khama tawngtai neih ni rawh se tih chu pawm a ni a, Central Committee lo bawhzui tura dah a ni.
7) Ram pum huap sual thupha chawi chawnghei tawngtai neih ni se tih chu kumin chawnghei tawngtai hunah Sual thupha chawi thupui hi telh ni se tih a ni.
8) Fa nei tam tura inzirtirna neih ni rawh se, tih chu pawm a ni a, Central Committee-in a tul anga lo bawhzui tura tih a ni.
9) Tunlai Social Media hrang hrangte hi a tha zawnga hman tangkai dan inzirtir ni rawh se, tih chu pawm a ni a, Central Committee-in ruahmanna lo siam rawh se tih a ni.
10) Ram pum huapin khawtlang nun siam thatna kawnga Hmeichhiate mawhphurhna tih booklet siam a, zir ni rawh se, tih chu Central Committee-in a tul anga lo bawhzui tura dah a ni.
11) Kohhran Hmeichhe Ni-a thu zir hi tawi fel deuha buatsaih ni rawh se tih a ni.