Mizoram Synod, Family Guidance & Counselling Centre (FG&CC)-in Kohhran hruaitute puala May 19, 2022 atanga SMTC-a 'Church Leaders' Intensive Residential Pastoral Care & Counselling Training' Vawi 34-na a buatsaih chu May 30, 2022 (Thawhtan) zan khan ‘Final Evaluation & Graduation Service’ neiin khar a ni.
Training kharna hun hi Rev. Lalsangbera, FG&CC Director-in a kaihhruai a, Rev. V.L. Luaia Hranleh, Executive Secretary i/c FG&CC-in training chhuakte hnenah Certificate semin thuchah a sawi. He Counselling Training-ah hian Pastor Bial 10 atangin Kohhran aiawh 34 an tel a ni.
Training kharna inkhawmah hian Training chhuakte chuan an hlawkpui dan a lema an ziak chu entirin an hrilhfiah a, Upa Thlengliana, Lunglei Bazar Veng chuan training chhuakte aiawhin thu a sawi a, Upa Vanalalliana, Com. Member, FG&CC chuan Training chhuakte a tawngtaisak a ni.
Thuchah sawitu, Executive Secretary Rev. V.L. Luaia Hranleh chuan "Lal Isua chuan Kohhran hruaitute hi kan mite hnenah ei tur pe turin min ti a. Chumi tur chuan kan theih tawp kan chhuah a ngai a ni. Harsatna leh buaina lo pung zel karah hian Kohhranhote tana malsawmna ni turin ke kan pen a ngai a ni," a ti a. Training chhuak tharte chu an thil zirte midang tana tangkai taka hmang zui turin a fuih a ni.
FG&CC hian Pastoral Care & Counselling Training hi Pastor-te pualin vawi 28 buatsaih tawhin, Pastor 479 training a neihpui tawh a. Church Leader-te puala kum 2002 atanga training vawi 34 a neihpui tawhah Kohhran hruaitu 754 Training pek an ni tawh bawk a ni.
Synod hian Counselling Centre pakua (9) - Mission Veng, Bawngkawn, Vaivakawn, Champhai, Serchhip, Kolasib, Lunglei, Mamit leh Khawzawlah te a nei a. Heng Counselling Centre pakuaah hian tun thlenga pantu (Client) an neih tawh zat chu mi 44,448 an ni.