Mizoram Presbyterian Kohhran hnuaia Committee sang ber, Synod Executive Committee Vawi 297-na, ni thum chhung awh tur chu vawiin (June 7, 2022) chawhma dar 10:00 atang khan J.M. Lloyd Hall, Synod Office-ah an thu tan a, member 141 an kal thei a ni.
Committee hi Rev. Dr. Vanlalnghaka Ralte, Synod Moderator-in a kaihhruai a, Synod Recretary report, Finance Officer report leh Audit Report te ngaihthlak a ni a. Annual Statement of Account thlirho a ni bawk. Hemi zawh hian Committee member ruat thar leh inthlakna hun hman a ni.
Rev. Z.D. Lalhmachhuana, Synod Secretary hnen atangin report ngaihthlak a ni a, Synod Service Rules 2022 chu Synod hnuaia Department hrang hrang hotuten zir hona hun Synod Office-ah an buatsaih thu te, Synod Inkhawmpui 2021, Gen. 68-in a rel angin Synod Moderator, Rev. Dr. Vanlalnghaka Ralte in Church Court 2 - Calcutta Mission Field (April 9, 2022) leh Jharkhand Mission Field (April 11, 2022) khan a hawn thu te, Synod Auditor-ten Synod sumte tluang takin an audit thu te, Myanmar ram buai avanga Mizorama raltlante khawchhak tlangdunga Pastor Bial 9 te huam chhunga chhungkua 1418 hnenah Mizoram Synod hmingin tanpuina Rs. 20,00,000/- pek a nih thu te, United Theological College, Bangalore te rawn dil angin Rs. 2,00,000/- tanpuina pek a nih thu te, Covid-19 Relief atan CWM atanga sum hmuh chu khaw puma hri kai 2, Bawlte leh Hmawngkawn hnenah pek an nih thu te, Kum 2021 Synod Thurel 70-na angin Manipur Synod leh Zou Synod-te chu thawhdunna thuthlung (Partnership Agreement) ziah thar pui an nih thu te, PCI 44th Biennial General Assembly chu Umroi Kohhran Biak In, Ri-bhoi Synod-ah April 27 - May 1, 2022 chhung khan neih niin Mizoram Synod atangin palai 135 an kal thu leh Puipate zingah Rev. Dr. K. Lallawmzuala, Executive Secretary chu Secretary (Sr.) a nih thu te, PCI 45th Biennial General Assembly chu May 2-5, 2024-ah Mizoram Synod-in an thlen tur thu te, KTP General Conference vawi 59-na chu Kolasib Diakkawn Field-ah May 5-8, 2022 khan tluang taka neih niin Rorel palai 1076 leh palai kal 9015 an awm thu te, FG & CC Counsellor, Rev. Sairengpuia Sailo (kum 55) chu Kidney Cancer avangin May 3, 2022 khan a thi a, an khua Kolasib Venglai Kohhranah Synod Moderator, Rev. Dr. Vanlalnghaka Ralte in a vui thu te, May 20, 2022 khan NEICC 79th Session, Barapani, Meghalaya-a neihah Mizoram Synod aiawhin Rev. Dr. C. Lalhlira, Rev. B. Sangthanga, Pi K. Lalliantluangi leh Dr. T. Vanlaltlani te an kal thu te, Mizoram Presbyterian Kohhran Hmeichhe Rorel Inkhawm vawi 11-na chu May 26, 2022 khan Mission Veng Kohhran Biak Inah neih niin palai 280 an kal thu te, Pastor kum 2022 April-a zirzo panga (5) te chu May 29, 2022 khan Induction neihpui an nih thu te, February 19, 2022 atanga March 20, 2022 thleng Synod Revival Speaker-ten Aizawl dai velah ruihhlo ngai leh zuin mite hnena rawngbawlna (Operation Nehemia) tluang tak an neihpui thu te, Mizoram Christian College (MCC) Principal Rev. Dr. Lalchungnunga chuan June 1, 2022 khan Principal thar Upa Dr. Tawnenga hnenah mawhphurhna a hlan thu te, Synod 2021 Gen. 1-na rorel kal zelah OM chuan Kohhran harsa 102 thlang chhuakin an mahni dawm chhuak tur Kohhran lian 102 a thlan chhuahten tha taka an bawhzui thu te, SEC 296 leh 297 inkarah Synod Relief fund atangin harsatna tuar mi hrang hrangte hnenah tanpuina Rs. 42,43,000/- pek a nih thu te leh SEC 296 leh 297 inkarah Revocation Certificate (RC) 101 leh Re-marriage License (RL) 283 pek a nih thu te chu report langsar zualte an ni.
Tun tum SEC-a thurel tur chhawpchhuah 57 a awm a, Myanmar raltlante lo dawnsawn dan tur chungchang te, Synod Hospital-a Visiting Consultant Doctor neih dan Policy dilna te, Bible Ralchhan School, ATC-a sawn rawtna te, Synod Hospital kum 100-na (Centenary) lawm leh a puala project neih chungchang te, Khmer tawnga Naupang Sunday School zirlaibu siam rawtna te, Presbyterian English School Manual enthat chungchang te, Pastor Pension-te Politics-a an inhman dan tur kaihhruaina te, Synod Office-a Mizoram Rural Bank (MRB) Branch hawn dilna te, Missionary lak dan enthat chungchang te, Kohhran Hmathlir Research base-a neih rawtna te, Pay Commission din chungchang te, Synod Mission Board hnuaia Contract Missionary-te chungchang zir chianna leh rawtna te, Fixed Pay-a rawihte chungchang te, Cachar Tlangrama thawktute chungchang te, Synod Archives Document Cloud Storage-a dah chungchang te leh Synfo Department enthatna te chu a langsar zualte an ni.
