Vawiin (June 16, 2022) khan Synod Bookroom chuan kumtina an lo tih thin angin Synod Bookroom Conference 2022 chu Synod Office, Devotion Hall-ah an hmang a, Mizoram puma Synod Bookroom thawktute an kal tha hle.
Conference hi zing dar 10-ah Upa H. Ronghaka, General Manager, PRESCOM chuan hawngin inlawmna thu a sawi a. Chawhma hunah Pu Vanlaltirha, Stock Supervisor, Synod Bookroom-in programme kaihruaiin Pi Rosy Lalhmingmawii, Accountant chuan Bookroom sum dinhmun report a pe a. Report atanga a lan danin kum kalta khan Synod Bookroom hian Covid 19 hripui karah dawr hawn mumal theih a ni mang lo chungin Rs. 11,44,80,949/- lai a thawk chhuak a. Pathian awmpuina leh Kohhran mipuite thahnemngaihna azara hetiang zat an thawk chhuak thei hi Synod Bookroom chuan lawmthu a sawi a ni. Pu Lalniliana Manager, Synod Bookroom chuan kum hmasa Bookroom Conference-a thurelte bawhzui a nih dan leh tihhlawhtlin a nih dan chi hrang hrang report a pe a. Hei bakah hian Financial Year thara Synod Bookroom budget Rs. 14,40,00,000/- chu a pharh nghal bawk.
Chawhnu lamah Upa H. Ronghaka, General Manager, PRESCOM-in kaihruaiin Mizoram puma Branch hrang hrangte atangin report leh rawtna te ngaihthlak a ni a. Kum kaltaa Bookroom rawngbawlna hrang hrang thlirletna leh sawizauna neih a ni.
Rawngbawlna hrang hrang thlirletna leh sawizauna hun hman zawh hian Pu Lalniliana Manager, Synod Bookroom-in Monthly Operation Review khaikhawmna a nei a. Operation review-a a lan danin 2021-2022 khan Synod Bookroom chuan School mamawh hralh vak lo mahse mipuiin lehkha an chhiar nasain lehkhabu an hralh that thu te, lehkhabu thar a chhuah tam thu a sawi.
Hun thumnaah Pu Lalniliana, Manager, Synod Bookroom chuan PRESCOM Manual 2022-a thil thar leh hriat ngaite kalkhawm te hrilhin; Zemabawk Branch thar hawn a nih thu te, Hnahthial-ah Branch thar hawng tura hmalak mek a nih thu leh Khawzawlah Branch thar hawn Board-in a remtih tawh thu sawiin hun a khar a ni.
Tun dinhmunah Synod Bookroom hian Branch 15 zet neiin Distribution Centre 44 a nei mek a. Nuai 911 zet senna tur Headquarters Office, Mission Veng a mi chu sak mek a ni bawk.