Synod Revival Speaker-te tana buatsaih Intuaitharna hun chu June 22 - 25, 2022 chhung hian Synod Conference Centre-ah riakluta neih mek a ni a, Revival Speaker 69 an tel thei a ni.
Intuaitharna programme hi June 22, 2022 zan khan hawnna inkhawm neih a ni a, Synod Moderator Rev. Dr. Vanlalnghaka Ralte-in Keynote Address a sawi.
Programme an hman chhung hian Revival Speaker-ten an rawngbawl zelna tur atana pawimawh thupui chi hrang hrang - Pathian thu hril dan tha, Harhna dik, Ramhruaitu thlan chungchanga Kohhran mite buatsaih, Rinawmna leh taihmakna, Kohhran ropuina leh pawimawhna tih te zirho a ni a, heng thupui te hi mithiam hrang hrangten an zirtir thin a, sawihona neih thin a ni bawk.
June 24, 2022 (Zirtawpni) zanah kharna inkhawm neih a ni ang a, he hun hi Rev. R. Lalnuntluanga, Committee member-in a kaihruai ang a, Rev. C. Zorammawia, Senior Executive Secretary-in Pathian thuchah a sawi ang a, Mission Veng Bial Zaipawl leh Nl. R. Lalrinmawii (Arini) te hnen atangin Pathian fakna hla ngaihthlak a ni ang. June 25, 2022 (Inrinni) tukthuan eikhamah an chhuak ang.
Tun dinhmunah Synod Revival Speaker 70 an awm mek a, Synod Revival Speaker-te puala riak luta Intuaitharna hun hi harsatna dang a awm anih loh chuan kum tina neih thin a ni.