Synod Bookroom chuan nimin (July 4, 2022) khan kar hnih chhung awh tur Reduction Sale chu Mizoram puma Synod Bookroom Branch leh Distribution Center zawng zawng leh Churachanpur-a Synod Bookroom-ah te a tan leh ta.
Kum hnih zet Synod Bookroom chuan Covid 19 hripui vanga Reduction Sale a kalpui theih loh hnuin kumin hian Reduction Sale hi a kalpui leh ta a, tum dang ang lo takin chawlhkhar hnih chhung kalpui tura ruahman niin July 16, 2022 (Iinrinni) thleng a awh dawn a ni. Reduction Sale ah hian Synod Bookroom-a lehkhabu zawng zawng, Bible, Kristian Hlabu, Communion thil, Kohhran mamawh chi hrang hrang, Stationery Item zawng zawng leh School Naupang mamawhte 5% - 80% discount-in hralh chhuah a ni a. A tantirh ni atangin mipuiin an hlut hle.
Synod Bookroom Reduction Sale hi a rualin Mizoram pumah neih tan a ni a. Headquarters, Mission Veng-ah chuan Synod Moderator Rev. Dr. Vanlalnghaka Ralte chuan Reduction Sale hi Pathian hnena hlanin Kohhran mipuite’n tangkai taka an hman theih nan a hawng a.
Lawngtlaiah chuan Lawngtlai Bookroom Committee Vice Chairman Rev. Lallungmuana’n Pathian hnena hlanin Sale hi a hawngin Sale hi tan nghal a ni a.
Lungleiah chuan Lunglei Bookroom Chairman Rev. Lalzawmliana’n Pathian hnena hlanin Sale hi a hawng bawk a.
Champhaiah chuan Champhai Bookroom Chairman Pastor Lalrinfela Pachuau-in hawnna hun kaihruaiin Rev. C. Lalchhuanawma’n Pathian hnena hlanin Sale hi a hawng bawk a.
Serchhipah Pastor H. Biakthansanga, Chairman, Serchhip Bookroom Commtt chuan sale hi tawngtaina neiin a hawng a, Mamit-ah Pastor Laltharzuala, Chairman, Mamit Bookroom Commtt-in sale hi tawngtainaa hawngin Sale kalpui zui a ni a.
Kolasib-ah Pastor C. Lallungmuana, Kolasib Bookroom Chairman chuan Pathian hnena hlanin Sale hi a hawng a, Upa R. Vanlalruata’n Sale hawn nan lehkhabu a lei zui nghal.
Siahaah Rev. Hmingthansanga Pachuau, Chairman, Siaha Bookroom Commtt-in Pathian hnena hlanin Sale hi a hawng a, Pu Benjamin MS. Dawngkiman hawnna thuchah a sawi bawk. Churachanpur-ah chuan Nicky Lalremmawia chuan hawnna hun kaihruaiin, Rev. P.B. Zosapthara, Administrative Secy, Manipur Area chuan Sale hi hawngin Rev. Lalremliana Colney chuan chuan lehkhabu a lei hmasa ber bawk.
Aizawl khawpui chhunga Branch zingah Vaivakawn Branch-ah chuan Vaivakawn Kohhran Committee ruahmannain Rev. Samuel Lalrinsanga’n sale a hawng a, Bawngkawn Bookroom ah Upa H. Lalthlamuana, Bawngkawn chuan sale hi hawngin hawnna hunserh hman a ni bawk. Chanmari Branch-ah Chanmari Kohhran Committee ruahmannain Rev. Rev. Vanlalnghaka, Bialtu Pastor-in sale a hawng bawk.
Synod Bookroom Reduction Sale hi mipuiin lehkhabu tha leina hun remchangah hmangin an hlut hle thin a. Sorkar Office, Kohhran leh Mimal Library neite pawhin a hlawma lehkhabu leina hunah an lo hmang tawh thin a. Hetiang huna lehkhabu an hralh chhuah thin hi a buatsaihtu Synod Bookroom lama hotute beisei leh rin ai pawhin a tam thin nia thu dawn a ni.
Reduction Sale neih hnuhnun ber 2019 kum khan kar khat chhunga lei chhuah kha Rs. 1,10,48,132.00/- lai a tling a. Kumin hian kum hmasa lama an lei chhuah zat hi khum ngei an inbeisei thu Synod Bookroom lama hotute chuan an sawi.
Tun tum Reduction Sale hi Synod Bookroom Branch 15 leh Distribution Centre 44 ah kalpui mek a ni a. Lehkhabu item 6800 chuangah discount hi kalpui mek a ni.