Rev. Dr. Lalchhuanliana (kum 83), pensioner chu July 8, 2022 zan dar 9:20 khan lungna avangin a thi a, July 9, 2022 chawhnu dar 1:00 khan Venghlui Kohhran Biak Inah Rev. Dr. Vanlalnghaka Ralte, Moderator, Mizoram Synod-in a vui.
Rev. Dr. Lalchhuanliana hi August 20, 1939 khân Rev. Chhâwnvunga (L) leh Hauzîngi (L)-te fa niin Champhai khuaah a piang a. An unau hi 9 niin, 3 an thi tawh a, puitlin thleng dam chu 6 an ni, chungte chu –
1. Thangziki (L) w/o F.V.L. Tawna (L), Champhai
2. K.Malsawma h/o Thanchhingi, Chaltlang, Aizawl
3. Dawngliana (L)
4. Rev. Dr. Lalchhuanliana h/o C. Lalhmangaihi, Venghlui, Aizawl
5. Lalkhawngaihthangi w/o Lianzika Sailo, Champhai
6. Dr. K. Lalchungnunga (L) h/o H. Zirliani (L), Chanmari, Aizawl
May 17, 1974 khân C. Lalhmangaihi d/o C. Hmingliana, Champhai nen Champhai Kahrawt Biak Inah inneiin fa 4 (pali) an nei a, an fate chu -
1. Esther Lalrinzuali w/o Laldanglova, Durtlang Mel-5
2. Rebecca Lalrintluangi w/o Lalrochunga, College Veng
3. Stephen Lalrinawma h/o Dr. T. Lalliankimi, Venghlui
4. Philip Lalrinngheta (L)
Zirna lam: Primary School atanga High School thleng Champhaiah lehkha a zir a, 1958 khan Matric a pass a, 1962-ah St. Anthony’s College, Shillong atangin IA (Intermmediate of Arts) a pass a, 1964-ah St. Edmund’s College Shillong atangin BA (Hons) a pass a, 1970-ah Serampore College, Serampore atangin BD a pass a, 1973-ah United Theological College, Bangalore atangin M.Th. a pass leh a ni.
Rawngbâwl tûra kohna: Rev. Dr. Lalchhuanliana hi a naupan lai atanga a nu leh pain Pathian rawngbâwltu atâna an serh hran bîk a ni a. Tleirâwl tirh atanga zûk leh hmuam leh ruih theih thil ti ngai lo a ni. Shillong-a B.A. zirlaiin hun puma rawngbâwl tûra kohna chiang takin a hre ta a. BA (Hons) a pass hnu chuan Pathianin hun puma rawngbâwl tûra a kohna chu chhângin, Synod Theo. Education Board tirhin kum 1967 khân Serampore College-a BD a zir ta a ni.
Rawngbawlna lam : 1970 June thla atangin Synod Theological Education Board chuan Aizawl Theological College-a lecturer hna thawk tûrin a ruat a, kum khat a thawh hnuin United Theological College, Bangalore-ah Master of Theology (Church History) zirin a kal leh a. Kum 1973-a MTh zir zova a lo kir leh atangin Aizawl Theological College-ah bawk 1986 thlengin a thawk ta leh a ni. ATC-a lecturer hnathawk chung hian Synod-in Vênghlui Pastor Bial-ah Pro. Pastor hna kum 1974 atangin a thawhtîr a. Kum 1977 Synod Inkhâwmpuiin Chanmari Kohhran Biak Inah Pastor tûrin a nemnghet ta a ni. College-a awm chhûng hian lecturer hna te, Hostel Warden hna te, Didakhe Editor hna te, Registrar hna te leh Principal hnate a thawk a. College-a thawk chungin Synod Secretary hna leh Moderator hna te pawh a thawk tel bawk.
Pastor hna a thawh
1986-1988 Dâwrpui Pastor Bialah Pastor
1995-1999 Pastor, Venghlui Pastor Bial
2000 January-ah a pension ta a ni.
Rev. Dr. Lalchhuanliana hian rawng a bâwl chhûngin Synod-ah mawhphurhna chi hrang hrang a chelh a, a vaia târ lan pawh a châkawm hle laiin a langsâr zual chauh han târ lang ila:
Mizoram Synod-ah :
1974-1977 - Probationary Pastor, Venghlui Pastor Bial
1977-1981 - Registrar, Aizawl Theological College
1981-1986 - Principal, Aizawl Theological College
1981-1986 - Secretary, Theological Education Board
1980-1982 - Secretary, Mizoram Presbyterian Church, Synod
1983-1984 - Moderator, Mizoram Presbyterian Church, Synod
1986-1988 - Pastor i/c, Dawrpui Pastor Bial Inkhawmpui
1987-1988 - Chairman, Dawrpui Pastor Bial Inkhawmpui
1986-1988 - Leader, Central Kristian Thalai Pawl
1989-1991 - Executive Secretary, Mizoram Presbyterian Church Synod
1989-1991 - Finance Officer, Mizoram Presbyterian Church Synod
1989-1991 - Secretary, Synod Finance Committee
1992-1994 - Senior Executive Secretary
1995-1999 - Pastor i/c, Venghlui Pastor Bial
1999 - Moderator, Aizawl East Presbytery
PCI General Assembly-ah :
1. Secretary, Theological Education Commitetee (1985, 1986)
2. Member Executive Committee (1984-1986, 1992-1994, 2013-2015)
3. Moderator (1996-1998)
Heng bakah hian NEICC, CASA, Senate of Serampore College, Bible Society of India-ah te chanvo hrang hrang a chelh tawh bawk.
Pension-a a chhuah hnuin heng rawngbawlnaah te hian a thawkzui:
1. Visiting Lecturer, Serampore College, Serampore, W.B.- January - March 2000
2. Resource Person, Christian Multipurpose Training Centre, Aizâwl - April 2000 - March 2000
3. Lecturer, Aizawl Theological College - January 2001 - Dec 2001
4. Teacher, Presbyterian Bible School -January 2004-2006
Rev. Dr. Lalchhuanliana hian a rawngbâwl chhûngin lehkhabu tha tak tak 13 lai a ziak a ni. Kum sawm thum rawng a bâwl chhûngin mi 2,199 Baptisma a chantîr a, nupa tuak 291 a inneihtîr bawk. Bial vawn rawngbâwl hna hi kum riat emaw lek a thawh avangin Baptisma chantîr leh inneihtîr pawh a nei tam lo hle.
Pathian leh Kohhran rawngbawl hna a thawh chhung hian Pathian a leh a Kohhran chungah a lawm em em thin a. A rawngabwl chhung zawngin a nupui leh a faten an tawiawm thin a, Pathian chu an ni tin nun kaihruaitu leh vengtu, an mamawh tinreng petu anihzia an hre chiang hle a ni. A thiamna te, a finna te, a remhriatna te zawng zawng hmanga rawngbawl-in, a hmaa mawhphurhna awm apiang tha taka hlen chhuah tum tlat mi a ni.
A hun tawp lam : Kum 2021 kum tir lam atangin a insawisel tan a, Doctor hnenah inentirin investigation hrang hrang tih a ni a. A pumpui ulcer hrik pai chi hmuh chhuah niin uluk taka enkawl a ni a, mahse, a ke vûng a reh theih loh bakah, a chau hma em em a, chuvang chuan, March 12, 2022 khan Trinity Hospital-ah inentir leh a ni a. Hetah hian Heart Failure a ni tih hriat chhuah a ni a. Damdawi hmanga enkawl a ni a, hma a sawn lutuk loh avangin April ni 21, 2022 khan Trinity Hospital-ah bawk inentir leh a ni a. Doctor-te rawn angin a lung chu Coronary Artery Angiography (CAG) hmanga en that leh tura ruahman a nih mek lain May ni 5, 2022 khan Internal Bleeding avangin Trinity Hospital-ah admit niin ICU-ah dah a ni a, thisen Unit 3 pek a ni. May ni 9, 2022-a Damdawi in a chhuahsan hnu atang chuan a chak lo chho-in in lamah inenkawl chhunzawm a ni a.
A lungphu a mumal lovin thawhah te a nei bawk a, May ni 25, 2022 khan Trinity Hospital-ah bawk admit lehin, a lungah Pacemaker vuah a ni a, May ni 29-ah Damdawi in chhuahsan lehin in lamah inenkawl leh a ni. Amaherawhchu, that lam a pan theih meuh loh avangin June 21, 2022-ah Trinity Hospital-ah inentir leh a ni a, a chuapah tui a tling a ni tih hriat a ni a, admit lovin in lamah damdawi nen inenkawl turin tih a ni a, khuh leh thawhahin a kiansan theih loh avangin June ni 28, 2022 khan Trinity Hospital-ah bawk admit leh a ni a, July ni 1-ah ICU-ah sawn luh a ni. Doctor-te’n theihtawp chhuah mah se, a BP leh oxygen level a hniam zel avangin July ni 8 zan dar 7:30 khan Ventilator hman a ni a. Amaherawhchu, a natna tawrh hi a lo nasat tawh avangin July 8, 2022 zan 9:20 khan thlamuang takin Lalpa hnenah a chawl ta a ni.
VUI PROGRAMME
A hmun : Venghlui Kohhran Biak In, Aizawl
A hun : Dt. 9.7.2022 (Inrinni);1:00 p.m.
Vuitu : Rev. Dr. Vanlalnghaka Ralte, Moderator, Mizoram Synod
Chanchin sawi : Rev. Z.D. Lalhmachhuana, Secretary, Mizoram Synod
Thlamuanna thuchah : Moderator, Mizoram Synod
Zaipawl : Venghlui Kohhran Zaipawl
Tawngtai : Rev. V.L. Luaia Hranleh, Executive Secretary, Mizoram Synod
Hla : KHB No. 502 ‘Fak leh dil hun lawmawmah hian’
Malsawmna : Rev. Lalsangbera, Statistician, Mizoram Synod
Thlanmual : Rev. Dr. P.B. Lalmalsawma, Pastor i/c Venghlui Bial