Vawiin (July 22, 2022) khan Mizo Sunday School Union (MSSU) buatsaihin MSSU Trainers Training chu Synod Conference Centre-ah neih a ni a, Bial aiawh mi 47 an kal thei a ni.
Training-ah hian Rev. V.L. Luaia Hranleh, Executive Secretary i/c MSSU-in hunserh a hmang a, MSSU Senior Trainer ten thupui chi hrang hrang - Sunday School chanchin, Sunday School pawimawhna leh zirtirtu nihna leh mawhphurhna, Psychology (Pre-Beginner to Junior) Zirtir dan leh Rualbanlo (Vohbik) enkawl dan, Psychology (Intermediate to Puitling) zirtir dan leh Sunday School tha buatsaih dan tih te hmangin an zirtirna an pe a, tlai lamah Synod Moderator Rev. Dr. Vanlalnghaka Ralte-in training kharna hun a hmang a ni.
Mizo Sunday School Union (MSSU), Training Cell Committee-in kum 2020 khan Trainers Training neih nise, tia a lo rel tawh chu hri leng avanga neih mai theih a ni lova, vawiin (July 22, 2022) khan Aizawl khawpui chhung Bial tin atangin Bial aiawh mi pakhat theuh sawmin Sunday School zirtirtu dangte training hi pe chhawng leh thei tura buatsaih a ni. Trainers Training hi kum 2006 leh 2012 khan riakluta neih a lo ni tawh a, kumin (2022) hian hri leng avangin ni khat chauh training hi neih a ni.
