Synod Multipurpose Training Centre buatsaih Lay Leaders’ Residential Training vawi 215-na kharna leh Graduation chu July 22, 2022 (Zirtawpni) zan khan SMTC Hall-ah neih a ni.
Training kharna inkhawm (Graduation Programme) hi Rev. Lalrinthara, Programme Director-in a kaihruai a, Rev. V.L. Luaia Hranleh, Executive Secretary i/c SMTC chuan kharna thuchah sawiin trainee-te hnenah Certificate a hlan. Trainee-te tana tawngtaisakna hi Resource person aiawhin Rev. Vanlalzuata’n a hmang a, trainees aiawhin Upa Rosiamliana, Thingsulthliah hnen atangin lawmthu sawina ngaihthlak a ni a, SMTC aiawhin Rev. T.C. Laltlanzova’n lawmthu a sawi bawk. Nl. Cindy Lalthanpuii, Tlangnuam sawm a ni a, fakna hla 2 sain hun a hmang bawk.
Tun tumah hian Presbytery 8 - Ramlai, Tuivawl, Lunglei East, Lunglei West, Tuichangral South, Tuirini, Sakawrhmuituai leh Chhimchhak Presbytery atangin Kohhran Upa 27 an tel thei a ni. Training-ah hian Resource person atan Rev. Vanlalzuata, Rev. C. Chawngliana, Rev. T.C. Laltlanzova, leh Rev. F. Lalrinnunga te hman an ni a, Synod Office Finance Manager Upa Lalsawmliana’n Sum Vawn Dan chungchang a zirpui bawk. Training chhung hian Resource person-te leh trainee-te hi SMTC hmunah an riahlut vek a ni.
Synod Multipurpose Training Centre hi kum 1996-a hawn a ni a, a hawn kum atangin Lay Leaders’ Training - Kohhran Upate puala training hi neih chhoh tan nghal a ni. Tun thleng hian training hi vawi 215 neih tawh a ni a, Kohhran Upa training nei tawh zawng zawng hi mi 7008 an ni.
SMTC-ah hian kum tluanin training programme chi hnih - Ministerial leh Vocational training kalpui a ni a. Kohhran tihnghehna leh tihhmasawn zelna tur Synod hnuaia Department hrang hrangin Training a buatsaih thinte hi SMTC-ah hian a remchan dan angin neih thin a ni. Vocational training hnuaiah hian trade chi hrang hrang - Tailoring, Diploma in Computer Application (DCA), Mobile Repairing, Beauty Culture te kalpui mek a ni a, August, 2022 atang hian trade 2 - Welding & Fabrication leh Electric Wiring & Repairing hawn thar tur a ni bawk.