Synod Worship Committee chuan nizan (July 26, 2022) dar 7 khan Synod Conference Centre-ah Residential Choir Conductors’ Training vawi 26-na a buatsaih chu Pathian hnena hlanna hun an hmang.
Pathian hnena Training hlanna hun hi Upa H. Lalhmingmawia, Co-ordinator, Synod Worship chuan a kaihruai a. Trainee-te tana hriattur pawimawh te leh training kalphung turte a sawi a. “Synod Worship Committee-in Zaipawl Conductor Training a buatsaihin Kohhran pawl dang mi rawn tel duh an awm chuan lawm taka an lo pawm thin” thu a sawi bawk. Upa F. Lalfakzuala, Synod Worship Committee Member-in tawngtaiin Pathian hnena a hlan hnuah zirna tan nghal a ni.
Tun tum Zaipawl Conductor training-ah hian mi 74 an rawn tel thei a, Kohhran pawl dang - IKK, BCM, ICI leh Presbyterian Church of Myanmar atangin mi 5 an tel bawk.
Zaipawl Conductor Training hi July 29, 2022 (Zirtawpni) zanah kharna hun hman tur a ni a, Synod Moderator Rev. Dr. Vanlalnghaka Ralte leh Rev. Dr. K. Lallawmzuala, Executive Secretary i/c Worship ten an hmanpui ang. Kharna hunah hian tha taka zir chhuakte hnenah certificate hlan an ni ang.
Synod Worship Committee chuan Zaipawl Conductor Training hi kum 1995 atang khan kum tinin a buatsaih thin a. Zaipawl Conductor Training-a zir chhuak hi mi 990 an awm tawh a, kumina trainee mi 74 nen chuan mi 1064 an tling dawn ta a ni.
